Membru Parlamentu Nasional. Imajen/dok.TATOLI

DILI (TATOLI)– Membru Parlamentu Nasionál (PN) husi Bankada PD, Elvina Sousa Carvalho, konsidera katak, asesu ba informasaun nu’udar diretu sidadaun hotu nian, inklui sidadaun sira mak ho kondisaun defisiénsia rona no ko’alia. Tanba ne’e, rekomenda ba Governu liuhusi Sekretaria Estadu Komunikasaun Sosiál (SEKOMS) atu bele implementa lian jestuál iha televizaun sira.

“Husu ba Sekretaria Estadu Komunikasaun Sosiál atu buka meius hodi bele providénsia lian jestuál iha televizaun sira iha rai laran”,  hateten Deputada Elvina Sousa Carvalho, ohin, iha nia intervensaun iha sesaun plenária PN.

 Nia hatutan, maluk defisiénsia sira mós hanesan sidadaun ne’ebé iha direitu hanesan atu asesu ba informasaun, liuliu ba RTTL ou televizaun ne’ebé mak iha Timor-Leste, tanba ne’e presiza iha meius atu sira bele asesu ho di’ak.

 Deputada Elvina Carvalho esplika, ema defisiente iha diretu atu asesu iha área edukasaun, saúde, liuliu asesu iha justisa tanba dala barak sira sai vítima no dalaruma sai autór iha kazu ruma, nune’e sira mós presiza hetan justisa ne’ebé loloos.

“Agora oinsá ita bele fó justisa loloos, se ita la konsege intende saida mak sira hakarak no ultrapasa”, tenik deputada Elvina Carvalho.

 Hatán ba kestaun ne’e, Ministru Reforma Lejizlativa no Asuntu Parlamentár,  Fidelis Leite Magalhães, rekoñese iha buat barak mak tenke haree no halo iha parte asesu ba informasaun, liuliu iha polítika inkluzaun tanba ne’e nia sei hatutan kestaun ne’e ba ministériu kompetente atu haree.

Jornalista: Julia Chatraina

Editór:  Francisco Simões

HAKEREK NO HATÁN

Please enter your comment!
Please enter your name here