Diretór DNRN, João Fernando Martins Borges. Imajen/Egas Cristovão

DILI,(TATOLI)-Diresaun Nasionál Rejistu no Notariadu (DNRN) sei implementa dekretu lei númeru 46/2011, Outubru, hodi implementa kobransa  ba sidadaun timoroan hotu ne’ebé submete ba prosesu produsaun sertidaun RDTL, sertidaun kazamentu sivíl, billete identidade (BI), guia de óbitu, rejistu kriminál, akizisaun nasionál ba kazamentu no seluk tan.

Diretór Nasional Rejistu no Notariadu, João Fernando Martins Borges, ohin, ba Ajénsia Notisioza TATOLI hateten, mezmu dekretu lei ne’e fó ona autorizasaun ba diresaun atu hahú halo kobransa iha  loron 1 Janeiru 2012, maibé to’o agora seidauk implementa.

“Dekretu lei númeru 46/2011 iha fulan Outubru hatete katak, ita hahú implementa kobransa emulamentes aktu rejistu notariadu ne’e iha loron 1 Janeiru 2012, maibé, ate data seidauk halo kobransa maske lei iha ona, tanba moris komunidade nian. Ami mós ezije para tinan sira tuir mai, ita bele kobra ona tuir dekretu lei ne’e”,  hateten João Borges nia servisu fatin, Bebora, Dili,

Tuir dekretu lei ne’e regula katak,  kobransa ba produsaun Billete Identidade pruvolta  US$5.00 ba kada sidadaun ida bainhira trata dokumentu ne’e, sertidaun Nascimento RDTL  iha  primeiru imprisaun gratuita maibé renova tenke selu US$3.00.

Atu fasilita sidadaun hotu-hotu hodi hetan BI, maka diresaun ne’e iha tinan kotuk estabelese ona servisu ne’e iha munisipiu 12 inklui Rejiaun Administrativa Espesiál Ambeno Oe-Cusse (RAEOA).

“Diresaun nasionál agora la tende ona ema mai husi munisípiu, maibé atende de’it ba kazu urjente sira, ema moras no pedidu mai husi instituisaun estadu sira, agora atendimentu ba populasaun bai-bain iha ida-idak nia munisípiu”, esplika João Borges.

Atu trata BI iha obrigasaun tenke lori Sertidaun RDTL, Kartaun eleitorál, foto koloridu tahan ida, deklarasaun xefe Suku no administradór postu.

Jornalista: Agapito dos Santos

Editór: Francisco Simões

 

HAKEREK NO HATÁN

Please enter your comment!
Please enter your name here