Diretora Rejionál WHO Sudeste Aziátiku, Poonam Khetrapal Sing. Imajen/espesiál

DILI,(TATOLI)—Organizasaun Mundiál Saúde (WHO-sigla Ingles), ohin, selebra loron mundiál saúde ho tema, “Saúde ba Ema Hotu: Ema Hotu, iha Ne’ebé De’it”.

Iha selebrasaun mundiál ne’e, WHO alerta atu profisionais saúde sira  servisu fó tratamentu saúde ne’ebé kualidade ba ema iha nivel komunidade ho grupu idade hotu, iha fatin ne’ebé de’it mak sira hela no kualkér tempu bainhira sira presiza, sein iha difikuldade finanseiru, mak fundamentál atu hasa’e kobertura saúde universal hodi atinje saúde no ben-estar ema hotu, iha ne’ebé de’it.

“Sistema saúde primáriu funsiona ho di’ak ne’ebé maka kobre hotu ema ida nia nesesidade saúde, durante vida tomak, mak sentrál ba kobertura saúde universal”,  hateten Diretora Rejionál WHO Sudeste Aziátiku, Poonam Khetrapal Singh, liuhusi komunikadu imprensa ba Ajénsia Notisioza TATOLI.

Kobertura Saúde Universal  (KSU) maka WHO nia meta númeru ida iha mundu. Iha WHO Rejiaun Sudeste Aziátiku, KSU sai tiha ona hanesan programa prioridade emblemátika dezde 2014. Rejiaun ne’e haree ona progresu ne’ebé enkoraja, ho hadi’ak kobertura servisu saúde esensiál iha nasaun hotu, ho disponibilidade médiku, enfermeiru, no parteira sira. Iha mós kolaborasaun entre-nasaun ne’ebé aumenta boot hodi hadi’ak asesu ba kualidade medikamentu liu husi Rede Regulatóriu Sudeste Aziátiku.

“Maske iha ona progresu, sei iha buat barak maka presiza atu hadi’ak, kuaze ema millaun 800 mak sidauk simu kobertura ba servisu saúde esensiál no pelumenus ema millaun 65 mak monu ba kiak tanba gastu iha saúde, barak liu ba gastu ai-moruk”,  hateten  Khetrapal Singh.

Identifika oportunidade no área ne’ebé presiza esforsu hodi alkansa KSU, Diretora Rejionál WHO ne’e hatutan, servisu liña oin tenke adapta ba dezafiu ne’ebé mosu mai – hanesan kontinuasaun kuidadu hodi hasa’e númeru ema ne’ebé sofre moras la hada’et no problema saúde asosiadu ho idozu. Servisu kuidadu primáriu tenke lidera hodi prevene no trata moras hirak ne’e.

Nia hatutan, servisu liña oin no ospitál tenke servisu hamutuk, hodi hasa’e utiliza kuidadu primáriu no hamenus númeru pasiente iha ospitál.

 “Kuaze populasaun barak mak ba atendimentu ne’ebé fornese husi klínika privadu no finansiadu husi pagamentu  diretu, ita presiza abordajen foun hodi responde ba dezafiu dobru atu proteje ema husi esplorasaun finansia no atendimentu kualidade lad’iak, enkuantu aproveita ativu husi setór privadu,” afirma Diretora Rejionál WHO.

Reprezentante komunidade no governu lokál maka aliadu prinsipál hodi harii komunidade saudavel. Bele utiliza teknolojia digital di’ak liu tan hodi permite ema no komunidade sira atu kuidadu sira nia saúde rasik.

Iha Outubru 2018, iha Konferénsia Globál kona-ba Kuidadu Saúde Primáriu iha Astana, nasaun iha mundu tomak konkorda ona katak fornese kuidadu saúde primáriu maka fundamentál hodi alkansa KSU. Iha Setembru 2019, Asembleia Jerál ONU nian sei organiza enkontru nivel altu kona-ba KSU, ne’ebé sei diskute kona-ba fornese asesu ne’ebé ekuitativa ba kuidadu saúde primáriu hodi atinje ‘Saúde ba Ema Hotu: ema hotu, iha ne’ebé de’it’.

 “Agora, liu fali uluk, Rejiaun ida ne’e bele aproveita momentum ne’e husi prosesu globál hirak ne’e no jere impaktu loloos iha fatin ne’ebé importante liu: iha nasaun, no iha baze. Hodi nune’e importante tebes atu alkansa saúde no ben-estar ba ema hotu, iha idade saida de’it”, hateten Khetrapal Singh.

EKIPA

HAKEREK NO HATÁN

Please enter your comment!
Please enter your name here