DILI,(TATOLI)-Iha trimestre dahuluk tinan 2019 nian, hatudu katak, kazu pendente iha Ministériu Públiku husi kazu 5.000 komesa menus ba kazu 3.000.
“Kazu pendente iha ministériu públiku oras ne’e menus ona ba 3.000, ne’e ita asegura hela tanba ita imajina iha Cavo-Verde iha kazu pendente 80.000-resin no iha Portugal iha kazu pendente millaun ida resin”, informa Prokuradór Jerál Repúblika (PGR-sigla portugés), José da Costa Ximenes, ohin, ba Jornalista sira iha Otél Timor.
José Ximenes rekoñese servisu maka’as husi majistradu hodi aselera prosesu investigasaun to’o akuzasaun hodi redús númeru kazu pendente iha rai laran hodi fó justisa loloos no lais ba sidadaun.
“Ami kontinua halo formasaun interna para reforsa no ami mós nafatin esforsu para bele prosesu ba kazu ne’e labele sa’e hodi mantein”, tenik PGR José Ximenes.
Nia dehan tan, mezmu instituisaun judisiáriu ne’e iha de’it majistradu no prokuradór 33 no husi total prokuradór ne’e na’in rua asume ona kna’ar hanesan Prokuradór Jerál Repúblika no Adjuntu no falta de’it 20 resin maka asume funsaun hodi prosesu kazu 3.000 resin.
“Iha tinan kotuk iha kazu 5.000 maka tama tanba ne’e ita iha kazu 3.000 ne’e iha estabilidade ne’ebé fó fiar mai ministériu públiku atu halo servisu ne’ebé di’ak”, José Ximenes hateten.
Jornalista: Agapito dos Santos
Editór: Francisco Simões
