DILI, (TATOLI) – Primeiru-Ministru (PM), Taur Matan Ruak, konvida membru governu indijitadu ne’ebé seidauk hetan posse hosi Prezidente Repúblika, Francisco Guterres Lú Olo, inklui membru governu atuál sira hodi fó hanoin ba malu kona-ba prosesu dezenvolvimentu nasionál.

“Enkontru ne’e ho karater informál, ne’ebé inisiativa hosi Primeiru-Ministru atu konvida membru governu sira indijitadu inklui membru governu atuál hodi troka ideia no atualiza informasaun ba malu kona-ba prosesu dezenvolvimentu”, Sekretáriu Estadu Komunikasaun Sosiál, Merício Juvenal dos Reis Akara, ba jornalista sira iha Palásiu Governu, ohin hafoin enkontru.

Hasoru malu ne’e, Akara hatete hanesan konsiderasaun hosi Xefe Governu ba esperiénsia no matenek durante governu anteriór nian, maske sira sei iha li’ur maibé akompaña prosesu dezenvolvimentu.

SEKOMS ba jornalista sira esklarese durante enkontru la ko’alia kona-ba asuntu remodelasaun.

“Públiku ho mídia sira mak espekula kona-ba remodelasaun, maibé enkontru ne’e la iha diskusaun ida kona-ba remodelasaun”, akresenta.

Governante ne’e haktuir iha enkontru informal, Xefe Ezekutivu husu ba membru governu sira atu foku ba servisu, labele preokupa kona-ba remodelasaun ne’ebé públiku espekula no labele rona demais ba boatu.

“Ami ohin partisipa enkontru sente kontente no fó hanoin ba malu oinsá Nasaun bele ba oin no prioridade saida maka tenke halo hodi responde preokupasaun povu nian”, afirma ho orgullu.

Enkuantu, iha enkontru ne’e membru governu no membru governu pendente fó hanoin ba malu no hato’o ida-idak nia perspetiva kona-ba preokupasaun no difikuldade ne’ebé governu enfrenta, liuliu preokupasaun povu nian atu oinsá bele fó resposta.

Entretantu, dezafiu ne’ebé maka membru governu sira hasoru hodi aprezenta ba PM maka lei orgánika iha ministériu balun ne’ebé seidauk aprova hodi difikulta servisu ministériu nian oinsá maka atu aselera prosesu servisu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here