Prokuradór Jerál Repúblika, José da Costa Ximenes. Imajen/António Gonçalves

DILI,(TATOLI)-Ministériu Públiku (MP) hahú ona halo konsultasaun ba ezbosu lei kona-ba estatutu foun ho artigu 240 hodi hadi’a liu tan servisu instituisaun judisiáriu nian.

Atu hetan in-put ne’ebé favoravel iha lei no estatutu foun ne’e, ohin, MP realiza semináriu internasionál ne’ebé hala’o iha otél Timor  hodi lori peritu nasionál ho internasionál nudár oradór xave atu esplora sira nia hanoin kona-ba  ezbosu lei estatutu MP.

Ministru Reforma Lejizlativa no asuntu Parlamentares, Fidelis Manuel Leite Magalhães, Imajen/Egas Cristovão

Oradór internasionál, kompostu husi Prokuradór Jerál Cavo-verde, Óscar Tavares, ne’ebé ko’alia tópiku perspetiva komparasaun servisu tanba durante ninia mandatu konsege halo alterasaun ba estatutu MP iha Cavo-verde.

Iha  mós oradór Joana Marques Vida hanesan eis Prokuradoria Jerál Repúblika Portugal tanba iha ninia mandatu konsege halo mudansa ba estatutu MP Portugal nian ho mós Doutór Karim Khan, hodi fahe ninia esperiénsia kona-ba kooperasaun internasionál.

Prokuradór Jerál Repúblika, José da Costa Ximenes hatete, estatutu tuan  ho ninia  artigu 88  fahe ba parte tolu, hanesan orgánika instituisaun, estatutu no dispozisaun tranzitória no final, tanba daudauk ne’e,  la korresponde ona evolusaun ba dezenvolvimentu setór justisa iha rai laran.

“Estatutu antigu halo iha situasaun ida atu responde ba situasaun iha momentu ne’ebá tanba agora daudauk ne’e iha lakuna no dezafiu barak, ita presiza foun para bele hadi’a, tanba ne’e maka ami hahú ho projetu foun ida ne’e”, hateten José da Costa Ximenes, ba jornalista sira.

Projetu lei foun ne’e, PJR José Ximenes, esplika, sei aumenta tan  kna’ar ida hanesan prokuradór jerál repúblika administrativa no fiskál, aumenta gabinete kooperasaun internasionál no konsellu konsultivu hodi kompleta servisu iha ministériu públiku.

Nia dehan, alende ne’e sei kria lei hodi regula  no define mandatu kuadru servisu MP nian bainhira hetan konfiansa  hosi estadu ka governu atu lidera instituisaun sira hanesan Comissão Anti Corrupção (CAC) no seluk tan. Nomos fó lisensa ba servisu prokuradór sira atu hetan lisensa ba estudu no lisensa iha loron ferias.

“Agora daudauk karreira iha ministériu públiku ne’e prokuradór ho adjuntu maka reprezenta MP iha tribunal sira iha ultimo instánsia no termina iha primeira instánsia tanba ne’e ami hakarak la’ós prokuradór jerál ho adjuntu de’it maka repzenta MP  iha ultima instánsia, maibé kria tan karreira foun ida hanesan ho juis konselleiru sira iha tribunal Rekursu, tribunal rekursu maka nomeia husi Presidente Repúblika, mais juis konselleiru sira ne’e karreira.

“Ita hasai tan kategoria ida para kria tan majistradu sira iha ne’ebá para korresponde ba tribunal sira iha primeira instánsia nian”, esplika PJR, Jose da Costa Ximenes.

Iha biban hanesan, Ministru Reforma Lejizlativa no asuntu Parlamentár, Fidelis Manuel Leite Magalhães,  ba jornalista sira depois abertura semináriu ne’e hatete, governu sei fó apoiu instituisaun judisiáriu ne’e intermu reforma ba lei ba haluan tan mapa judisiáriu hodi estabelese tan servisu prokuradór munisipiu, apoiu funsionamentu instituisaun, promosaun, fasilidade no formasaun.

“Governu prontu atu servisu hamutuk ministériu públiku iha ámbitu kuadru lejizlativa atu governu bele apoiu atu hadi’a di’ak liután servisu ministériu públiku hodi servi di’ak ita nia sidadaun”, Fidelis Magalhães hateten.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here