Eis Primeiru-Ministru Kay Rala Xanana Gusmão. Imajen/Egas Cristovão

DILI, (TATOLI)-Lider Rezisténsia, Kay Rala Xanana Gusmão, ohin,  fó orientasaun  ba instituisaun Falintíl-Forsa Defeza Timor-Leste (F-FDTL) ho Polísia Nasionál Timor-Leste (PNTL) atu hamutuk kontribui ba atividade limpeza jerál semanál.

 “Soe tuun, soe sa’e ‘hakilar uitoan’ sira (komunidade-red). Mas, antes atu hakilar sira, imi ba hamoos uluk lai. Nune’e, kuandu ‘hakilar’ ne’e ema bele dehan  loos duni. Deskulpa”, hateten Lider karizmátiku, Xanana Gusmão, iha ámbitu enkontru preparativus Komisaun Organizadora Selebrasaun festa Konsulta Populár ba da-20 no Misaun INTERFET, iha salaun Ministériu Negósiu Estranjeiru no Kooperasaun (MNEK), Praia dos Coqueiros-Dili.

Xanana mensiona tan, se bele instituisaun F-FDTL ho PNTL hahú ona, iha kada semana ida no ba nafatin. “Depois halo apelu; haree ba, depois ami liu fali iha ne’e mak haree fo’er, ferik-katuas, xefe suku, xefe aldeia sira hotu mai hamoos”.

“Ita tenke halo buat ida, lae hein de’it mak rezolusaun mak ita ba hamoos. Ida ne’e apelu de’it, imi bele halo; bele halo, ne’e konforme ita-boot sira (F-FDTL no PNTL-red)”, hateten Xanana Gusmão.

Xanana hatutan, bainhira instituisaun seguransa no defeza realiza limpeza, bele influénsia mós inan-aman sira no timoroan sira seluk. “Imi ba mak hanesan, ama sira, apa sira, ba ajuda hotu. Ne’e, imi-nia espíritu ne’e maka’as”, tenik Kay Rala Xanana Gusmão.

Iha governasaun ne’ebé lidera husi Primeiru-Ministru Taur Matak Ruak, liuhusi Sekretáriu Estadu Komunikasaun Sosiál (SEKOMS), Merício Juvinal dos Reis “Akara” alerta ba ministériu hotu, inklui sidadaun sira, hahú loron 22 Fevereiru 2019, tuku 14:00 hala’o limpeza jerál iha Timor-Leste laran tomak, bazeia ba rezolusaun governu nú.8/2019.

Notísia relevante: http://www.tatoli.tl/2019/02/rezolusaun-limpeza-jeral-hahu-aban/

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here