Konsileiru Konsellu Imprensa ba asuntu Dezenvolvimentu Mídia, Hugo Fernandes

DILI,(TATOLI) –Centro Nasionál Chega I.P (CNC) preokupa ho baze legal ka  lei ba arkivu ne’ebé to’o agora seidauk iha.

Diretór Ezekutivu CNC, Hugo Maria Fernandes, hateten, CNC sente preokupa tanba hasoru hela dezafiu kona-ba enkuadramentu jurídiku arkivu nian.

“Ita presiza lei arkivu, maibé to’o agora Timor-Leste seidauk iha, entaun kuandu ita koko loke atu asesu ba arkivu, ita ladún iha konfiansa tanba baze legal saida maka atu proteje ita”, hateten Hugo Maria Fernandes, ba jornalista sira, ohin, iha Palásiu Governu, hafoin hasoru malu ho Primeiru Ministru (PM), Taur Matan Ruak.

Hugo Maria Fernandes, orgullu tanba iha semana kotuk submete ona ezbosu dekretu governu rua ba Primeiru Ministru atu bele hahú diskute iha Konsellu Ministru hodi bele aprova. Nune’e, iha tinan ida ne’e, Timor-Leste iha ona estatutu jurídiku, tanba Timor-Leste mós iha ona sítiu istóriku hamutuk 37.

Primeiru Ministru Taur Matan Ruak, husu nafatin ba CNC atu prioritiza ba prezervasaun arkivu sira, tanba husi parte seluk mós CNC iha arkivu barak loos maibé presiza iha enkuadramentu jurídiku no presiza iha kondisaun ne’ebé maka di’ak liu.

Iha 2019 nia laran ba oin, Hugo Fernandes hateten, CNC kontinua halo prezervasaun ba fatin istóriku sira, mezmu tinan kotuk halo ona iha Dili, Ermera no Baucau, maibé sei kontinua halo mapamentu sítiu istóriku sira iha Baucau atu kompleta, nune’e kontinua ba Aileu ho Manatuto.

Introdusaun Chega iha eskola sira, dezenvolve kurríkulu ba matéria tolu maka eskola primária no sekundária nian, ba disiplina istória, direitus umanus no edukasaun sidadania.

CNC hanesan Institutu Públiku ida ne’ebé tutela ba Primeiru Ministru tanba ne’e mak CNC mai hasoru Xefe Governu hodi informa progresu servisu durante 2018 nian ho dezafiu saida de’it mak CNC hasoru, inklui planu ne’ebé mak CNC  atu halo ba tinan oin nian.

Jornalista: Zezito Silva

Editór: Francisco Simões

 

 

HAKEREK NO HATÁN

Please enter your comment!
Please enter your name here