Ministru Justisa, Manuel Cárceres da Costa. Imajen/ Egas Cristovão

DILI,(TATOLI)-Iha semana rua (2) nia laran tan, Governu liuhusi Ministériu Justisa (MJ) sei submete lista naran prizioneiru sira nian ba Prezidente Repúblika (PR), Francisco Guterres Lú Olo, atu bele hetan indultu.

MJ hala’o servisu no koordenasaun hela ho entidade servisu prizionál ne’ebé akumula ona lista naran prizioneiru sira nian hamutuk na’in 60-resin atu bele submete ba Prezidente Repúblika hodi hetan indultu iha loron nasionál restaurasaun independénsia, 20 de Maiu ho mós loron proklamasaun independénsia, 28 Novembru, tinan ne’e.

Lista naran hirak ne’e MJ simu mós balun nudár pedidu husi família kondenadu ho balun fali husi Defensoria Públiku (DP).

“Prosesu ne’e lao hela tanba iha ona enkontru entre gabinete Prezidente Repúblika ho gabinete Ministériu Justisa nian hein katak semana rua tan lista ne’e submete ona ba gabinete Prezidente Repúblika para Prezidente bele tetu prosesu indultu”, informa Ministru Justisa, Manuel Cárceres da Costa, ohin, iha Sentru Formasaun Judisiáriu, Caikoli, Dili.

Ministru Justisa Manuel Cárceres da Costa, esplika, kritéria sira atu hetan indultu maka kondenadu tenke kumpre ona kadeia um tersu husi total kondenasaun tribunal, kondisaun saúde la permite ona no idade avansadu.

http://www.tatoli.tl/2019/02/komportamentu-diak-mak-dalan-hodi-hetan-perdaun/

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here