Primeiru-Ministru, Taur Matan Ruak. Imajen/Egas Cristovão

DILI, (TATOLI)—Primeiru-Ministru, Taur Matan Ruak, hateten, mentalidade sidadaun sira, seidauk preparadu atu moris iha sidade, tanba ne’e, se la aplika orden no regra, bele halo sidade sai fahi luhan.

“Uluk hanesan prezidente repúblika, ha’u krítika Administrasaun Munisipál Dili tanba hasai vendedór sira, maibé ohin ha’u hanesan primeiru-ministru, ha’u haree katak dalaruma ha’u ba hamoos rai, sira (vendedór) tuur tonka hasan hateke de’it ha’u. Ne’e la ajuda para prestejía Timor”, hateten PM Taur Matan Ruak, ba jornalista sira iha Palásiu Prezidente Nicolau Lobato, Bairru Pité, ohin, relasiona ho vendedór ambulante sira hetan tiru hosi polísia ho gas lakrimijéniu iha Parlamentu Nasionál nia oin, foin lalais ne’e.

Taur  hateten katak, maske Timor-Leste tama iha kategoria terseiru mundu, maibé timoroan nia kakutak ne’e tenke primeiru mundu, se lae lori fali ábitu sira iha foho mai fali sidade. Tanba ne’e, nia husu ba komunidade liu-liu vendedór sira atu kumpre regra no koopera ho seguransa Estadu.

Xefe Governu ne’e hateten, kestaun ne’e mós parte ida husi preokupasaun governu nian halo oinsá maka halo polítika ida ajuda setór informál hanesan ambulante sira ne’e atu movimenta ba setór formál, para vendedór ambulante sira  komesa aprende regra no prosedimentu.

Iha fatin hanesan, Komandante Jerál Polísia Nasionál Timor-Leste (PNTL), Komisáriu Faustinho da Costa, informa katak, kazu tiru gas lakrimijéniu ba vendedór ambulante no estudante sira iha Parlamentu Nasionál nia oin iha hela prosesu investigasaun nia laran.

“Prosesu investigasaun ba kazu ne’e la’o hela. Hosi prosesu ne’e maka ita foin deteta katak lala’ok ne’e oinsá no parte ida ne’ebé maka viola lei,” Komisáriu Faustino da Costa hateten.

Jornalista: Xisto Freitas

Editór: Francisco Simões

 

2 KOMENTÁRIU

  1. W iha sugestaun deit hakarak hato’o Liu husi komentariu ida nee, bainhira Ita Bandu vendedores Sira atu lbele fa’an sasan tuir Strada ibun.
    Primeiru tenki kria Fatin ba vendedores Sira Tamba Ita hare Agra Fatin ba vendedores Sira la to’o Tamba nee guverno tenki tau atensaun ba Ida ne’e
    Segundo vendedores Sira iha direitu atu fa’an sasan Tamba Ida nee hanesan nesesida Ida atu subtenta Sira Nia Moris Liu husi fa’an sasan Ida bele hodi selu Sira Nia oan ba iha Skola se Ita boot Sira Bandu Tia ntaun Sira Nia Moris nee atu sai saida bainhira Bandu Tia aileba Sira atu labele fa’an sasan.

  2. Estetmentu ne la kondis situasaun real povu Aileba nian tanba kondisaun nbe estado prepara mos sedauk apar ho Ambienten moris povu baileba nian ,halo lei labele ba rona deit supermerkado nian maibe rona mos aileba nian atu Aileba bele Kontribui ba lei, husu ba Govenu atu halo survei atu hatene se mk soe lixu barak liu, Povu aileba mak soe lixu barak liu ka konsumedor mk soe lixu barak liu,ka supermerkado sira mk soe lixu barak liu ou riku sira mk soe lixu barak liu? atu halo lei karik apar ho kondisaub real atu sidasaun sira labele kontra atu hamenus konflitu iha Timor leste.

HAKEREK NO HATÁN

Please enter your comment!
Please enter your name here