DILI,(TATOLI)-Governu liuhusi Ministériu Justisa (MJ), submete ona ezbosu lei kona-ba orden advogadu ha Ministériu Prezidénsia Konsellu Ministru (MPCM-sigla portugés) atu bele hetan apresiasaun husi Governu da-ualu.
Ministru Justisa, Manuel Cárceres da Costa hatete, ezbosu lei ba kriasaun orden advogadu ne’e hato’o ona ba gabinete MPCM depois ajenda ba Konsellu Ministru halo apresiasaun molok haruka ba Parlamentu Nasional aprova no lori ba Prezidente Repúblika atu promulga.
Ba jornalista sira iha Sentru Formasaun Judisiáriu, Caicoli, Dili, ohin, Ministru Manuel Cárceres da Costa, hateten, lei orden advogadu ne’e atu kria organizasaun ida hodi halibur advogadu privadu iha Timor-Leste no mós mekanizmu no regulamentu hodi regula sira.
“Funsaun hosi lei orden advogadu ne’e atu estabelese uluk orden advogadu privadu hotu-hotu hodi halibur sira, kria mekanizmu , regulamentu hodi regula advogadu privadu ninia lala’ok iha ita nia rain”, hateten Manuel Cárceres.
Jornalista: Agapito dos Santos
Editór: Francisco Simões
