Ema dekoñesidu, Kinta (4/4/2019), tuku 1:30 meiudia, tuda karreta taxi ida iha Polísia Eskuadra Ai-mutin nia oin. Imajen/Francisco Simões

DILI, (TATOLI)—Komunidade lubun ne’ebé hamriik no halo movimentu iha estrada ibun entre Eskuadra Polísia Ai-Mutin ho Estasaun kombustivel Mekar Fuel nian, hakfodak, tanba derrepente de’it, ema deskoñesidu lansa fatuk husi empreza mebel nian  sai mai kona aserta taxi ida nia vidru odamatan oin nian.

Komunidade balun haree hela kondisaun taxi ida ne’ebé ema deskoñesidu tuda iha Eskuadra Polísia Ai-Mutin nia oin, Kinta (4/4/2019). Imajen/Francisco Simões

Akontesimentu ki’ik ne’e, mezmu la rezulta ema ida kanek, maibé taxi ho númeru matrikula 35.357 TLS, ninia vidru odamatan karuk, rahun namtate monu ba kadeira laran  atu hanesan rai-henek.

Kondutór taxi, Jaime da Costa, hakfodak no arrepende boot, tanba nia la hatene buat ida no la iha problema ida ho ema seluk, mas teki-teki de’it, ema bele tuda nia taxi iha kedas Polísia Eskuadra Ai-Mutin, Comoro nian.

Jaime da Costa, lori nia karreta taxi halai husi diresaun Merkadu Comoro nian atu tesik liu ba diresaun Ai-tarak Laran, maibé foin to’o de’it iha parte Eskuadra Polísia Ai-Mutin nia oin, ema deskoñesidu lansa tuda sai husi aredór empreza mebel nian hodi kona kedas karreta nia vidru.

Tanba besik kedas Eskuadra Polísia Ai-Mutin, Jaimé da Costa, hola inisiativa para sees tiha karreta taxi ne’e iha kedas fatin akontesimentu hodi ba halo keixa ba autoridade seguransa ne’ebé halo hela servisu iha eskuadra polísia refere. Nune’e, laliu minutu balun de’it, Polisia Task Force  na’in haat (4) hakat mai haree karreta nia kondisaun no liu ba halo identifikasaun hodi buka hatene ema ne’ebé lansa tuda husi aredór empreza mebel nian.

“Ema ne’e brani duni. Oras loron manas boot ne’e, nia bele tuda karreta iha estada públiku no besik kedas Eskuadra Polísia Ai-Mutin”, hateten Marcos da Silva, ne’ebé ba haree mós kondisaun karreta ho sofer taxi iha fatin akontesimentu.

Akontesimentu iha tuku 1:30 meiudia ne’e, husi parte Polísia Eskuadra Ai-Mutin, Munisipiu Dili, kontinua halo hela identifikasaun no rekolla informasaun hodi bele buka tuir no kaptura autór ne’ebé tuda karreta taxi ne’e.

Husi sorin seluk, komunidade balun hakbesik ba Jaime da Costa hodi fó konseilla ba nia atu foti tiha fatuk ne’ebé ema deskoñesidu tuda hasoru nian ne’e lori ba hamulak no rai iha fatin lulik hodi halo promesa.

Tuir ema hirak ne’e nia hanoin katak, uainhira fatuk ne’e lori ba tau iha uma lisan ka fatin lulik ruma ou tau iha altar Igreja nian hodi halo promesa, maka lakleur de’it, ema ne’ebé hanoin at hodi tuda ema inosente bele hetan malisan no bele simu konsekuénsia la di’ak iha nia vida moris.

EKIPA

HAKEREK NO HATÁN

Please enter your comment!
Please enter your name here