Primeiru-Ministru, Taur Matan Ruak. Imajen/Egas Cristovão

DILI, (TATOLI) – Kompañia ConocoPhillips no Shell Energy extende tan prosesu sosa asaun ba loron 16 abril ne’e.

“Husi ita nia parte buat hotu-hotu la’o di’ak, tanba ami preparadu kedas para selu iha 18 marsu nian maibé iha problema tékniku ka prosesuál Board Investment hosi Austrália nian entaun sira adia ba 5 abril. Maske nune’e, probavelmente sei dada tan uitoan”, Primeiru-Ministru, Taur Matan Ruak, ba jornalista sira iha Palásiu Prezidente Nicolau Lobato, Bairru Pité, kinta ne’e hafoin sorumutu ho Prezidente Repúblika, Francisco Guterres Lú Olo.

Nia haktuir informasaun ne’ebé nia simu hosi parte kompañia exploradór (ConocoPhillips no Shell) katak prosesu sosa asaun ne’e sei extende ba iha 16 abril ne’e.

Situasaun ne’e, Xefe Governu akresenta laiha implikasaun ba Timor-Leste, tanba ne’e hein katak bainhira Board Investment (konsellu ba investimentu) konklui sira nia prosesu entaun Timor-Leste sei halo transferénsia orsamentu.

“Selu multa bainhira ita maka la kumpre kompromisu, maibé ita kumpre hela”, eis Prezidente Repúblika haklaken.

Antes ne’e, Ministra Finansa En-ezersísiu, Sara Lobo Brites, deklara Timor-Leste sei halo pagamentu ba sosa asaun hosi Conoco Philips no Shell Energy iha sesta (5/4) tanba Timor-Leste preparadu ona.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here