Ministru Justisa, Manuel Cárceres da Costa, kongratula graduandu sira iha serimónia graduasaun iha Sentru Formasaun Jurídiku no Judisiáriu, Caicoli, Dili, foin lalais ne'e. Imajen/Mídia GMJ

DILI, (TATOLI) – Sentru Formasaun Jurídiku no Judisiáriu (SFJJ), ohin fó graduasaun ba advogadu privadu timoroan 34 ne’ebé termina ona kursu durante tinan rua iha SFJJ, Kaikoli.

“Ha’u hakarak rai hela mensajen ba ita boot sira katak investe uluk ita boot sira nia naran, labele halai buka uluk matéria”, apela Ministru Justisa, Manuel Cárceres da Costa, ba graduandu sira iha nia diskursu.

Númeru ne’e, ministru dehan kompleta ona advogadu privadu 200 resin kompostu hosi timoroan 100 resin no restu ema estranjeiru.

Atu investe imajen pesoál hodi hetan  dignifikasaun hosi komunidade no sosiedade timoroan, Cárceres dehan hala’o kna’ar tenke tuir lei haruka.

“Ita boot sira nia kna’ar boot maka atu hatudu ba timoroan hotu katak prezunsaun inosénsia sagradu tebes iha prosesu judisiáriu, se-lae juis fó sentensa, prokuradór halo akuzasaun, ita boot sira halo defeza tuir sentensa, tuir prasa públika nia hakarak ne’e labele akontese tan”, afirma.

Nu’udar advogadu tenke aprende beibeik lei no konstituisaun sira no mós lian-portugés, tanba lei hotu hakerek ho lian ne’e.

“Ohin ita halo serimónia rekoñesimentu aptidaun atu sira bele ezerse ona funsaun, kna’ar no profisaun hanesan advogadu privadu iha ita nia rai”, afirma.

Formasaun etapa da-neen  sei kontinua iha 2020, tanba  tuir planu governu sei reforma instituisaun ne’e en-termu kurríkulu no seluk tan iha tinan ne’e.

Iha biban hanesan, reprezentante formadu, advogadu Marcelo da Rosa, hatete kna’ar ne’e nu’udar responsabilidade ida todan atu defende diretu timoroan  ne’ebé presiza tebes justisa  hodi hetan lia loos.

“Funsaun prinsipál ba advogadu sira maka kontribui ba buat ne’ebé nesesária ba justisa  no defende diretu públiku timoroan nian hodi hetan asesu ba justisa hodi hetan justisa ida justu no imparsiál ba desizaun sira”, akresenta.

Nune’e mós advogadu Fernando da Costa agradese ba governu  liuliu ministériu justisa nia apoiu.

“Nu’udar advogadu privadu sei apoiu administrativamente ba setór justisa  ho imparsiál ba ita nia sidadaun ne’ebé presiza justisa”, promete.

Iha ámbitu ne’e Prezidente Konsellu Jestaun Disiplina no Advokasia privadu, Nelinho Vital, iha ninia diskursu hatete graduasaun ne’e nu’udar rekoñesimentu atu sira bele ezerse kna’ar hodi kontribui ba justisa no salvaguarda direitu no interese lejítimu sidadaun nian.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here