BNCTL Dili. Foto/Google.

DILI,(TATOLI)– Banku Dezenvolvimentu Aziátiku (ADB-Asian Development Bank) prontu fó apoiu ba Banku Nasionál Komérsiu Timor-Leste (BNCTL-sigla portugés) atu fasilita kréditu hodi bele fó benefísiu ba timoroan.

Reprezentante ADB iha Timor-Leste, Paolo Spantigati hateten, nia parte diskute hela oinsá atu apoiu BNCTL tanba ADB  fiar katak banku ne’e importante tebes ba Timoroan sira.

Hafoin hasoru malu ho Ministru Reforma Lejislativa no asuntu Parlamentar, Fidelis Leite Magalhães, ohin, iha Palásiu Governu, Paolo Spantigati, informa ba jornalista sira katak, difikuldade boot bainhira timoroan atu asesu kréditu hodi halo negósiu tanba fallansu iha sistema, nune’e nia fiar ho prezensa parseiru sira bele tulun BNCTL hodi fasilita timoroan hotu bele asesu kréditu fasil no lalais.

Kona-ba nia enkontru ho Ministru Fidelis Magalhães ne’e, ko’alia  uitoan kona-ba atu hadi’a atendimentu no servisu BNCTL no mós Planu Assembleia Jerál BNCTL. Basa, Governu da-ualu ne’ebé lidera husi Primeiru Ministru (PM), Taur Matan Ruak, nomeia mós Ministru Fidelis Magalhães nudár asionista Estadu ba BNCTL.

Nomeiasaun membru governu sai asionista iha BNCTL hodi haree osan ne’ebé governu investe iha banku ne’e jere tuir lalaok banku nian ou la’e, nune’e mós ajuda BNCTL hodi implementa polítika fó kréditu barak ba kliente, asesu finanseira ba komunidade hodi halo negósiu no seluk tan hodi apoiu prosesu dezenvolvimentu.

Timor-Leste hola parte ona iha ADB hanesan banku ba infraestrutura ida no organizasaun ida ne’ebé mak hanesan organizasaun multilaterál ba país membru sira.

ADB rasik hanesan parseiru dezenvolvimentu, fó empréstimu ba Governu Timor-Leste hodi hadi’a estrada Tibar-Liquiçá, Tibar-Gleno, estrada Baucau-Viqueque, estrada diresaun Manatuto-Baucau no projetu infraestrutura seluk tan ho montante boot, maibé Governu mós konsege selu ona empréstimu balun. 

Iha mós apoiu tékniku hanesan kolaborasaun no kooperasaun, liu-liu iha dezenvolvimentu fíziku iha rai laran. Atuasaun banku dezenvolvimentu ne’e bazeia pedidu Governu nu’udar país membru bainhira presiza.

BNCTL rasik nu’udar banku Estadu nian, iha Janeiru to’o fin Juñu 2017, fó ona kréditu millaun $72  ba emprezáriu nasionál hahú husi mikro empreza to’o médiu hodi fasilita  finansiamentu ba dezenvolvimentu setór privadu iha rai laran.

Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here