I Vise Sekretaria Parlamentu Nasional, Angelina Sarmento. Imajen/Egas Cristovão

DILI,(TATOLI) – Grupu Parlamentár Sudeste Aziátiku ba Direitu Umanu (APHR – ASEAN Parliamentarians for Human Right), ohin,  iha Parlamentu Nasional, Dili, halo lansamentu ba toolkit relasiona ho asuntu liberdade relijiaun no fiar nian.

Intensaun husi lansamentu ba toolkitne’e hala’o iha Timor tanba nasaun sira iha ASEAN foti Timor-Leste hanesan ezemplu atu promove nafatin toleránsia ba relijiaun no mós liberdade ba relijiaun iha nasaun sira ASEAN nian.

Iha ASEAN iha mós grupu deputadu sira ne’ebé halibur aan hodi haree kona-ba asuntu direitu umanu iha rejiaun ASEAN nian no asuntu ne’ebé sira tau matan liu kona-ba liberdade relijiaun.

Vise Prezidente PN, Angelina Sarmento, hateten, Timor-Leste nia toleránsia ba relijiaun iha país ida ne’e aas tebes, hanesan toleránsia atu promove partisipasaun polítika husi lider sira ne’ebé mai husi relijiaun seluk.

 “Grupu Parlamentár Sudeste Aziátiku hili Timor-Leste nu’udar nasaun ne’ebé iha esperiénsia di’ak kona-ba asuntu liberdade relijiaun nian, tanba Timor-Leste iha esperiénsia pozitivu tebes, relasaun entre relijiaun katóliku ou relijiaun seluk hanesan protestante, evanjélika, musulmanu ka relijiaun seluk ne’ebé eziste iha ita nia rai”,  hateten Deputada Angelina Sarmento.

Deputada ne’e hatutan, toolkit ne’ebé lansa hodi ajuda deputadu sira ne’ebé haknaar  aan bele promove inkluzaun bainhira iha debate  ka audiénsia ho governu.

Toolkit kona-ba oinsá kompriende, proteje, promove, no valoriza liberdade relijiaun no fiar iha Timor-Leste nu’udar meiu ida ba parlamentu, liuliu ba deputadu sira ne’ebé haknaar an mós iha APHR atu iha debate, audiénsia ka diskusaun ba programa orsamentu sira, bele iha mós sensibilidade ba asuntu liberdade relijiaun no fiar”, esplika Angelina Sarmento, hodi dehan tan, “Nune’e ita nia programa sira bele promove inkluzaun iha relijiaun minoria sira no mós programa sira ne’ebé naun diskriminativu ba grupu relijiaun minoria sira ne’ebé mak eziste iha Timor-Leste”.

Tuir Angelina, atividade lubuk ida mak halo ona iha país seluk hanesan iha Indonézia sira koko atu halo diálogu ho relijiaun minoria sira, kompara ho Timor-Leste maioria katólika maibé iha Indonézia maioria mak musulmanu.

“Programa ida ne’e alvu ba liu ba grupu relijiaun minoria sira iha Indonézia hanesan katólika, protestante. Ita iha Timor-Leste maioria katólika, ita nia alvu mak oinsá governu bele kria polítika ida ne’ebé di’ak atu kontinua respeita direitu umanu, toleránsia ba relijiaun seluk liuliu musulmanu, protestante no relijiaun seluk ne’ebé mak eziste iha Timor”, nia hatutan.

Jornalista: Julia Chatarina

Editór: Francisco Simões

 

HAKEREK NO HATÁN

Please enter your comment!
Please enter your name here