Sekretáriu Estadu Ambiente Demétrio de Amaral de Carvalho, Imajen/Egas Cristovão

DILI, (TATOLI) – Konsellu Ministru (KM) atribui ona kompeténsia ba Sekretáriu Estadu Ambiente (SEA) hodi halo negosiasaun ho empreza Mura ne’ebé dezenvolve teknolojia CAT-HTR hodi transforma plástiku ba óleu.

CAT-HTR mak teknolojia inovadora ne’ebé transforma plástiku ba óleu ne’ebé inventa husi Thomas Maschmeyer, profesór kímika iha Universidade Sydney, Austrália, no daudaun implementa ona iha Inglaterra.

“Ita haree katak teknolojia ne’e di’ak, se Timor-Leste bele foti opsaun ida ne’e ita bele ajuda redús ita-nia problema rua dala-ida”, Demétrio afirma iha Palásiu Governu hafoin reuniaun KM, ohin.

Nia hatutan tan: “Ita iha problema plástiku, ita iha problema óleu fo’er, teknolojia ne’e estabelese iha Timor-Leste ita rezolve ita-nia problema kona-ba plástiku no sai fali ba óleu, gazolina, nune’e mós ita-nia óleu fo’er sira ita bele resikla sai fali óleu ne’ebé uza fali”.

Entaun teknolojia ida ne’e di’ak ba Timor-Leste no bainhira konta de’it husi dadus estatístika plástiku ne’ebé soe de’it ne’e lakon osan barak.

“Se ita fó valór ba plástiku, ita bele hetan rendimentu balu husi transformasaun plástiku ba enerjia”.

Aprezentasaun ne’ebé SEA halo sobre empreza ne’e, iha reuniaun Konsellu Ministru  aprova no fó kompeténsia ba SEA atu follow up (akompaña) prosesu inklui negosia ho empreza atu haree ezbosu nota entendimentu ida para sirkula fali ba Konsellu Ministru antes hetan aprovasaun finál.

Amstrong Energy no Licellla mak na’in ba Empreza Mura ne’e no sira iha propriedade intelektuál ba utilizasaun teknolojia ne’e.

CAT-HTR, utiliza bee iha presaun aas no temperatura aas hodi bele transforma rezíduu husi plástiku ba produtu ne’ebé ho valór aas.

Ho forma teknolojia ida ne’e fó dalan hodi hamenus rezíduu husi plástiku iha oseanu no hamenus problema sira ne’ebé mak kauza husi emisaun karbonu dióksidu ne’ebé provoka ahi han plástiku, aléinde ne’e fó mós dalan atu kria fonte reseita ho transformasaun rezíduu sira ne’e.

Empreza Mura sei responsavel ba projetu no Timor-Leste hanesan parseiru ideál ba implementasaun projetu ida ne’e, haree husi nia karaterístika jeográfika no sosiál.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here