Foto hamutuk Profisionál komunikasaun sosiál ne’ebé partisipa iha fsemináriu valorizasaun. Foto SEKOMS.

DILI, (TATOLI) – Profisionál komunikasaun sosiál kuaze 30 husi mídia oioin partisipa iha semináriu valorizasaun hodi hasa’e koñesimentu kona-ba modelu jestaun no supervizaun finansa públika.

Semináriu ho tema “As Instituição Superiores de Controlo e o Estado de Direito Democrático: O Papel da Comunicação Sosiál” ne’e realiza tanba Parseria Hodi Hadi’ak Prestasaun Serbisu Liuhusi Reforsa Jestaun no Supervizaun Finansa Públika (PFMO-sigla inglés) hamutuk ho Konsultóriu Língua Portugeza ba Jornalista sira (CLJ, sigla iha portugés) no koordenasaun ho Sekretáriu Estadu Komunikasaun Sosiál (SEKOMS) ne’ebé hahú iha 3 to’o 12 abríl ne’e.

Objetivu hosi semináriu ne’e analiza sistema demokrasia no Estadu Direitu, no mós instituisaun ho kompeténsia auditoria iha Timor-Leste (TL) no fomenta diskusaun sobre dezafiu prinsipál órgaun komunikasaun sosiál iha garantia servisu informativu izentu, independente no transparente ba sidadaun.

Alende ne’e durante semináriu ko’alia kona-ba funsaun no papél instituisaun superiór kontrolu iha país nian, no identifikasaun papél no serbisu jornalista no orgaun komunikasaun sosiál iha dezempeñu kobertura mediátika iha siklu finansa públika nian.

Responsavel ba Kooperasaun Delegasaun Uniaun Europeia iha TL, Simon Le Grande, hatete meiu komunikasaun sosiál dezempeña papél hanesan podér dahaat ne’ebé konstituída iha Konstituisaun RDTL ho sentidu iha influénsia atu kontrola no akompaña jestaun.

Nia mós hatutan papél komunikasaun sosiál seluk mak supervizaun no implementasaun finansa públika denunsia eventu irregularidade iha jestaun hanesan kazu korrupsaun sai vijilante iha influensia desizaun ne’ebé interese ba jestaun osan públiku nian.

“Importante konsidera katak podér kontrabalansu, iha ezersísiu nia tarefa sei fornese informasaun ida izenta, profisionál no transparente iha garante liberdade informasaun no atu informa respeita direitu fundamentál personalidade nian, ba onra no naran di’ak no ba reputasaun”, Simon hatete iha abertura semináriu ne’e iha Sentru Kulturál Portugés iha embaixada Portugál, ohin.

Hatutan PFMO hakarak apoia meiu komunikasaun sosiál, partikulár iha nia atividade ba prevensaun, supervizaun independente ba atividade ne’ebé interese ba servisu informasaun públika no privada iha nasaun.

“Iha Timor-Leste, mídia iha papél sentrál iha dezempeña atividade informasaun izenta ba públiku. Partikularmente, kuandu trata jornalizmu ekonómiku-finanseiru, mídia bele dezempeña papél krusiál ida iha fasilita informasaun simples, asesivel no izenta ba públiku mezmu enfrenta difikuldade iha kompriensaun polítika orsamentu Estadu no fundu públiku destinadu ba dezenvolvimentu país nian”.

Mídia bele ajuda promove debate públiku no mantén Governu ida responsavel perante sidadaun ida informada no bele dezempeña papél oioin iha prosesu siklu orsamentu liuliu kobertura profisionál ida, no mós ezekusaun konkreta orsamentu Estadu nian no polítika aplikada iha kada munisípiu nasaun nian.

Embaixadór Portugál iha TL, José Pedro Machado Vieira, hatete inisiativa husi atividade ne’e iha objetivu atu jornalista bele aumenta nia kompeténsia ba akompañamentu prosesu avaliasaun no supervizaun finansa públika.

Seluk fali, nia dehan koñese instrumentu autoridade supervizaun ne’ebé akompaña no kontrola uzu rekursu públiku, hanesan Parlamentu Nasionál, Tribunál no Kámara Konta, Prokuradoria Jerál Repúblika, PSIK, Komisaun Anti Korrupsaun no Inspesaun Jerál Estadu.

Tema ba asaun formasaun ne’e kompleksu, ezijente liu no importánsia boot liu ba dezenvolvimentu sosiedade.

“Atuasaun jornalista no profisionál seluk iha área ne’ebé informada liu, rigorozu no responsavel kontribui ba mellor eskrutíniu husi parte sidadaun nian, ho impaktu diretu iha desizaun públika Estadu nian”.

Iha momentu ne’ebé Timor-Leste hakarak konsolida nia demokrasia, estabiliza seguransa no reforsa investimentu iha dezenvolvimentu sósiu-ekonómiku, iha prosesu ne’ebé aprezenta frajilidade balu, prosimidade ne’ebé sosiedade sivíl nune’e mós hanesan meiu komunikasaun sosiál iha ho komunidade hatudu poténsia boot atu kontribui ba garante pás no dezenvolvimentu inkluzivu no sustentavel país nian hanesan nia prosesu regulár desentralizasaun nian.

Semináriu ida ne’e sei iha panelista timoroan no internasionál, husi área profisionál oioin hanesan espesialista Parlamentu Nasionál nian, Kámara Konta, Sentru Informasaun Jurídika, Konsellu Imprensa, Organizasaun Sosiedade Sivíl, Orgaun Komunikasaun Sosiál no Konsultór espesialista iha kestaun liga ba jestaun no supervizaun finansa públika.

 Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here