Ministra Solidariedade Sosiál no Inkluzaun Armanda Berta dos Santos. Imajen/António Gonçalves

DILI, (TATOLI)-Ministra Solidariedade Sosiál no Inkluzaun (MSSI), Armanda Berta dos Santos, hateten, MSSI iha diresaun ida trata asuntu kona-ba ema ho defisiénsia, tanba ne’e molok atu lori proposta lei kona-ba ema ho defisiénsia hodi aprezenta no diskute iha reuniaun Konsellu Ministru (KM) hodi aprova tenke iha uluk lei orgánika ida.

“Hein de’it ita-nia lei orgániku ministériu nian, sei divulga iha Jornál da Repúblika, ita mós enkaixa ona ida ne’e, ne’ebé sei relata kona-ba ema ho defisiénsia”, hateten Ministra Armanda Berta dos Santos ba TATOLI, ohin, iha Palásiu Governu, hafoin partisipa reuniaun Konsellu Ministru.

Ministra Armanda Berta akresenta, ema ho defisiénsia iha talentu ne’ebé mak di’ak no reprezenta mós timoroan ba iha nasaun seluk no hetan mós trofeu ne’ebé mak di’ak ba nasaun.

Nia konfirma mós katak, atu lori proposta kona-ba ema ho defisiénsia ne’e ba iha aprezenta no diskute iha Konsellu Ministru liuhusi prosesu ida.  Nia rekoñese katak prosesu ne’e sei la’o neineik no  sei haree duni.

Kona-ba kompromisu ligadu ba asuntu ne’e, Ministra Armanda Berta dos Santos hatán, “Ha’u labele promete. Ha’u haree hela lai; se buat ruma mak ita bele rezolve iha ministériu, ita bele. Karik difisil no deside iha Konsellu-ministru, ita bele lori mai. Buat sira ne’e hotu lori prosesu”.

Iha fatin ketak, Asosiasaun Defisiente Timor-Leste (ADTL) ne’ebé kompostu husi RHTO, ETBU (East Timor Blind Union), Klibur Domin no seluk tan, husu ba governu, inkluzivamente MSSI (Ministériu Solidariedade Sosiál no Inkluzaun) atu lori lalais ezbosu Dekretu Lei Konsellu Nasionál ema ho defisiénsia ba Konsellu Ministru atu bele aprova no bele estabelese Konsellu Nasionál ema ho defisiénsia.

Notísia relevante; http://www.tatoli.tl/2019/03/adtl-husu-mssi-aprezenta-dekretu-lei-kona-ba-defisiensia-ba-konsellu-ministru/?fbclid=IwAR1pz414le3QWMjZI_LaBRvC5MCQabs1JrgDYdAUmIVX4H7kVZWbAHVArmU

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here