Ministru Obra Públika, Salvador Eugénio Soares dos Reis Pires. Imajen Tatoli/Egas Cristóvão

DILI, (TATOLI) – Ministru Obra Públika (MOP), Salvador Pires, hateten estrada Dili-Likisá-Ermera ho Dili-Ainaru estraga no monu tanba dezastre naturál ne’ebé provoka husi mudansa klimátika no la’ós fallansu iha dezeñu ka tékniku.

“Depois ita halo kalkulasaun hanesan Auto-estrada Suai, ita halo tiha teste geo-tékniku ne’ebé hatudu katak rai ida orijinál nia tuur ba ne’e, rai halai tomak tanba udan, la’ós sala iha design (dezeñu) maibé iha mudansa klima”, afirma hodi hatán preokupasaun Luta Hamutuk no Públiku nian kona-ba kualidade projetu estrada Dili-Likisá-Ermera ho Dili-Ainaru, iha Palásiu Governu, kuarta (3/4).

Nia afirma tan: “Kompañia tuir instalasaun no dezeñu, se hanesan instalasaun ruma mak aat tanba instalasaun la di’ak, la iha kualidade, entaun iha retensaun ne’e, kompañia sira iha devér atu halo fali durante períodu termina iha kontratu, ne’ebé bolu períodu retensaun”.

Ministru Salvador Pires esplika ba Parlamentu Nasionál (PN) katak bainhira halo dezeñu sempre bazeia ba presipitasaun udan. Porezemplu, Dili nian moderadu 500 milímetru (mm) kada tinan, maka’as liu 800 mm kada tinan. Maibé kuandu derrepente tanba mudansa klima iha siklu tinan haat, rua, ne’e akontese mak nia volume barak liu provoka rai halai, ida ne’e mak forsa major.

“Iha forsa majór ne’e, la tama responsabilidade ba retensaun. Ne’e mak, atu asegura forsa major ka lae ne’e, depende ba teste jeo-tékniku”, katak.

Agora auto-estrada halo ona, nia dehan prevensaun, Autoridade Dezenvolvimentu Nasionál (AND) halo hela verifikasaun, iha tempu badak haree lai kustu lori ba Konsellu-ministru aprezenta atu oinsá aproxima, tanba ida ne’e la’ós kompañia nia sala, la’ós dezeñu mak sala maibé tanba forsa majór.

Salvador Pires afirma Timór la’ós hela iha planeta ketak tanba ne’e bainhira akontese mudansa klimátika Timór mós bele afetadu hanesan mós nasaun seluk iha mundu ne’e.

“Iha Indonézia jalan toll (auto estrada) barak mak hetan inundasaun, karreta liu la di’ak. Agora Timór ne’e diferente saida ho nasaun seluk? Iha treze (13) munisípiu ne’e, balun kona, balun lae. Alende ida ne’e, governu investe ho rekursu ne’ebé mak iha, disponivel. Ne’e mak dehan prosesu konstrusaun nasaun”, katak tan.

Nia dehan Governu anteriór halo, ida mai hatutan. Ita iha etapa, ita iha planu atu bele halo uluk ida ne’e ka ida ne’ebá, kompara Ministru Salvador Pires.

Notísia relevante; http://www.tatoli.tl/2019/03/luta-hamutuk-preokupa-kualidade-estrada-dili-liquica-ermera-no-dili-Ainaru/

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here