Fuma sigaru bele mós hamosu kankru ran. imajen/google.

DILI, (TATOLI)— Dadus no relatóriu husi Institutu Siénsia Saúde (ICS-sigla portugés) Dili, hatudu katak, ema na’in 32 maka mate ona tanba kankru ran (kankru sangue).

Responsavel ICS, Gregório Rangel, informa katak, pasiente kankru ran hirak ne’e mate tanba laiha rekursu, liuliu laboratóriu atu deteta kankru ran.

Hafoin hasoru malu ho Prezidente Repúblika, Francisco Guterres Lú Olo, ohin, iha Palásiu Prezidente Nicolau Lobato, Dili, responsavel ICS lia tun dehan, Kauza husi moras kankru ran mai husi fatór jenétiku no kauza seluk maka fuma no hemu tua.

Intensaun husi sorumutuk ho PR Lú Olo ne’e atu informa ba Prezidente Repúblika  kona-ba semináriu “Kankru Sangue” ne’ebé sei realiza iha ICS Dili, Kampung Baru, iha fulan Abril ne’e nia laran.

“Semináriu ne’e sei ko’alia kona-ba oinsá peritu saúde husi estranjeiru bele mai enkoraja profisionál saúde sira no koko nafatin sira (profisionál saúde) para sira bele prepara rekursu umanu ne’ebé di’ak atu bele fó asisténsia saúde ba ita-nia komunidade ne’ebé afetadu ba kankru ran”, hateten Gregório.

Prezidente Repúblika entusiaz ba atividade ne’e no kongratula estrutura ICS ne’ebé iha inisiativa hala’o semináriu ne’e. Gregório mós relata katak, ICS prodús ona rekursu umanu ne’ebé graduadu hamutuk ema na’in 112, iha ne’ebé balun serbisu ona iha ospitál nasionál, balun iha klínika privada, balun iha ONG ne’ebé tau matan ba área saúde.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here