Premiu "Habali Ambiente", Imajen/Egas Cristovão

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, iha tinan ne’e sei lansa fali programa ne’ebé Governu Dalimak halo tiha ona antes mak kompetisaun Suku Saudavel ho naran foun Prémiu Habali Ambiente nu’udar prémiu aas liu iha área ambiente nian iha Timor-Leste.

Prémiu ida ne’e sei fó ba kategoria rua maka ida, Prémiu Habali Ambiente ba suku sira, kompetisaun suku ne’ebé konsege halo promosaun ba ambiente ne’ebé di’ak liu no prémiu seluk fó ba defensór ambiente ida ne’ebé bele iha indivíduu, bele iha entidade koletiva hanesan Organizasaun Naun Governamentál (ONG) ka empreza ruma ne’ebé hatudu sira-nia dedikasaun ba promove ambiente ne’ebé di’ak no halo programa inovativu iha sira-nia atividade hodi “Habali Ita-Nia Ambiente”.

“Prémiu ida ne’e nia plaka ne’ebé iha inan-feton ida dasa hela rai, ita-nia aman ida ajuda hela inan-feton ne’e ra’ut fo’er sira. Ne’e hatudu filozofia ida katak ambiente ne’ebé moos ne’e responsabilidade hahú kedas iha nivel umakain, família, hahú kedan iha nivel knua, suku. Tanba ne’e sei ita hakarak Timor-Leste ida di’ak liu, saudavel liu ba ita hotu no ba futuru jerasaun sira, ita presiza hahú kedas ita-nia toman, kultura foun moris iha ambiente ne’ebé saudavel liu ka halo atividade sira ne’ebé kontribui ka habali ita-nia ambiente”, Demétrio afirma iha Bebora ohin.

Sekretáriu Estadu Ambiente, Demétrio do Amaral de Carvalho. Imajen/Egas Cristovão.

Prémiu ida ne’e sei fó iha 5 juñu, iha loron internasionál ambiente nian no suku sira ne’ebé manán sei hetan orgullu boot ida tanba hetan tratamentu espesiál no plaka Prémiu Habali Ambiente sei entrega ba sira nu’udar prestasaun boot ida ne’ebé sira merese simu no iha insentivu osan ne’ebé nia valór sei determina depois avalia kondisaun rekursu finansiamentu hodi halo promosaun ba prémiu ne’e.

Aléinde ne’e iha kondisaun seluk maka SEA sei oferese ba suku premiadu sira sei hetan asisténsia espesiál, Ambiente sei serbisu hamutuk ho sira besik liu iha promosaun treinamentu no karik iha fasilidade hodi halo treinamentu ba joven, membru suku sira ne’ebé hetan prioridade boot liu suku sira seluk.

Kritéria ka sasukat hodi halo avaliasaun ba suku nian mak dahuluk, espasu verde iha suku ne’e trata ho di’ak, iha atividade ne’ebé hala’o regulármente iha suku hodi habali ambiente hanesan halibur lixu, halo protesaun ba ambiente liuhusi tara-bandu ka protesaun ba bee-matan, tasi-ibun, ai-laran tuan ruma iha suku laran, menus atividade sira ne’ebé estraga ambiente, ne’e demonstra husi menus problema ambientál iha sira-nia suku, fízikamente hatudu mós kondisaun lixu la barak iha suku, ezgotu sira moos, mota sira la nakonu ho fo’er, ai-laran, dalan-ninin sira trata ho di’ak no to’o kondisaun sira ne’ebé presiza haree hanesan menus sunu rai no ta ai.

“Lideransa lokál demonstra nia leadership hodi halo jestaun di’ak ba ambiente. Ne’e indikadór importante atu avalia suku sira ne’ebé ita sei halo avaliasaun”.

Ba entidade koletivu non-suku ka pesoál ne’ebé sei simu prémiu kategoria rua Habali Ambiente ne’e, dahuluk, sei haree sira-nia dedikasaun, lideransa hodi promove ambiente ne’ebé di’ak liu iha sira-nia serbisu fatin ou programa sira.

“Sira demonstra sira-nia lideransa hodi defende salva-guarda ambiente, halo advokasia ba ambiente hodi hamenus estragu. Sira hatudu programa inovativu sira hodi promove dezenvolvimentu sustentavel, halo tuir prosedimentu no lei ambientál sira hanesan atividade ki’ikoan ne’ebé sira halo iha lisensa ambientál, halo jestaun ne’ebé di’ak liu ba sira-nia atividade ou negósiu. Indikadór balun ita haree iha green business ka industry ne’ebé halo, sira merese atu hetan rekoñesimentu husi Estadu ho prémiu habali ambiente ne’e”.

Iha loron internasionál meiu ambiente iha 5 juñu tinan ne’e sei oferese prémiu no sertifikadu ne’ebé sei asina husi Primeiru-Ministru. Kompetisaun ida ne’e sei halo ba suku sira iha territóriu hotu.

Prémiu Habali Ambiente hanesan instrumentu edukasaun ambientál ida atu bolu ema barak liu atu partisipa iha esforsu sira ba habali ambiente.

Governu hasai ona rezolusaun ida hodi halo limpeza jerál fulan ida dala-ida, prémiu ne’e hakarak haree sesta kada fulan suku sira-nia partisipasaun iha limpeza jerál ne’e iha ka lae no informasaun sira ne’e sei hetan husi Ministériu Administrasaun Estatál hanesan entidade ida ne’ebé superviziona Governu lokál hodi fó informasaun ba panelista hodi halo avaliasaun loloos.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here