Uma Fukun Parlamento Nacional,Imajen Egas Cristovão

DILI, (TATOLI) –Mákina fornesimentu bee ba sistema irrigasaun iha Munisipiu Bobonaro  avaria hela, tanba ne’e, fó impaktu ba natar hektare  1.500 iha irrigasaun Maliana 1 no mós ba natar hektare 2.5 iha irrigasaun Maliana 2.

Liuhusi fiskalizasaun Komisaun D Parlamentu Nasional (PN) nian iha Munisipiu Bobonaro, foin lalais ne’e, identifika katak, udan boot foin lalais ne’e estraga tiha mákina distribuisaun bee ba  irrigasaun boot rua (2) iha Bobonaro.

Deputada Olinda Guterres, nudár membru Komisaun D  liu husi sesaun plenária, ohin, relata hodi husu ba Ministériu Agrikultura no Peska (MAP) atu hadi’a no buka solusaun lalais ba mákina distribuisaun bee ba irrigasaun iha Bobonaro ne’ebá tanba afeta tebes ba produtividade natar hectare ba hektare iha irrigasaun Maliana 1 ho Maliana 2.

Iha sorumutuk Komisaun D nian ho Prezidente Autoridade Munisipiu Bobonaro, Jeferino Soares dos Santos, mós aprezenta ba komisaun D atu bele relata ba iha MAP hodi buka lalais solusaun ba situasaun mákina refere.

 “Ami husi atu fasilita ekipamentu pezadu hanesan eskavatór hodi normaliza sistema irrigasaun no kontrola segmentasaun ka rai henek ne’ebé taka kanál irrigasaun Maliana 2”, hateten Deputada Olinda Guterres husi Bankada KHUNTO.

Komisaun D mós haree diretamente irrigasaun ki’ik lubuk ida iha Bobonaro ne’ebé mak hetan estragu total husi  husi inundasaun, foin lalais ne’e.

“Sistema irrigasaun Mautalu, Suku Meligu, Cailaco hetan estragu husi mota no fó impaktu ba agrikultór sira hodi halai natar no ameasa mós torre eletrisidade ne’ebé liga ba postu administrativu Cailaco”, informa Deputada Olinda Guterres.

Relatora ne’e informa total área potensiál iha Munisípiu Bobonaro hamutuk hektare 7662, ne’ebé eziste iha postu administrativu haat hanesan Maliana, Cailaco, Balibó no Atabae, la inklui Bobonaro no Lolotoe, hahú husi tempu Indonézia to’o agora maibé produsaun menus ba beibeik ho kondisaun atuál.

Nia akresenta mós hodi dehan, besik tinan rua impasse polítika halo MAP Munisípiu Bobonaro la iha orsamentu hodi halo manutensaun ba tratór sira nune’e sempre aluga no la iha kombustível ba ekipamentu pezadu hodi halo normalizasaun ba irrigasaun.

 “Rekomenda ba MAP atu aumenta manutensaun tratór ba munisípiu hotu ho hanoin katak orsamentu US$2.000 ne’ebé aloka kada tinan la sufisiente tanba durasaun ba tratór sira liu ona tinan 10”, Olinda Guterres hateten.

Hafoin rona relatóriu Komisaun D, Deputadu Bankada Fretilín, Francisco Miranda Branco apresia relatóriu komisaun ne’e no konsidera fiskalizasaun ne’e hanesan diagnóstiku ba setór produtivu Estadu nian.

“Diagnóstiku nia rezultadu lamentável tebes tanba setór produtivu ita husik hanesan ne’e, sistema irrigasaun iha área produtivu ne’ebé bele prodús foos, maibé agora nia situasaun bele sai refénsia atu ita halo diagnóstiku ida”,  Francisco Branco hateten.

Nia lia tun dehan, “diagnóstiku ne’e hatudu katak ita sei hakarak dependente nafatin, hafoin ita gasta osan lubuk ida, maibé rezultadu iha setór agrikultura mak nune’e”.

Deputada Bankada CNRT, Maria Fernanda Lay hateten kona-ba agrikultura bainhira iha rekomendasaun, nia husu atu avalia fali atu tratór sira bele sosa foun mak di’ak ou sei bele hadi’a.

“Ita akizisaun halo kleur ona, hanesan mós karreta iha tempu para nia operasionál la presiza hadi’a de’it maibé sosa foun de’it”, Deputada Fernanda Lay hateten.

Nia hatutan, kona-ba eskavatór, Instituto Jestaun Ekipamentu (IGE-sigla portugés) iha ekipamentu mak bele fó apoiu.

Hatan ba kestaun ne’e Prezidente Komisaun D, Deputada Virgínia Ana Belo hateten iha tempu badak komisaun ne’e iha planu atu bolu Ministru Agrikultura no Peska hodi halo audiénsia iha komisaun hodi bele aprezenta hanoin balun husi deputadu sira.

“Kona-ba tratór, haree ba orsamentu karik, iha hanoin atu hadi’a uluk”,  hateten Deputada Virgínia Ana Belo.

Jornalista: Julia  Chatarina

Editór: Francisco Simões

HAKEREK NO HATÁN

Please enter your comment!
Please enter your name here