Diretór Ezekutiva TIC TIMOR I.P, Roberto Caitano de Sousa Vicente. Imajen/TIC TIMOR I.P

DILI,(TATOLI) – Projetu instalasaun fibra ótika terrestre halo hotu ona iha munisipiu 12. Ho nune’e, ohin, Diretór Ezekutivu Ajénsia Tecnologia da Informação  e Comunicação, Instituto Publico (TIC TIMOR I.P), Roberto Caitano de Sousa Vicente, atualiza  servisu instalasaun fibra ótika terrestre ne’e ba Primeiru Ministru (PM), Taur Matan Ruak, iha Palásiu Governu.

 “Ami mai informa ba Primeiru Ministru sobre planu no progresu implementasaun programa TIC TIMOR IP 2019, inkluindu  projetu fibra ótika terrestre”, informa Roberto Caitano de Sousa Vicente ba jornalista sira.

Nia hateten, investimentu fibra ótika terrestre la’o ho di’ak no susesu, tanba bele fasilita ona servisu hotu hodi asesu ba sítiu ka website ajénsia nian ne’ebé iha ligasaun ho freebalance, inklui bele halo ona komunikasaun ba malu  entre munisípiu ida ba munisípiu seluk no nasionál to’o munisípiu.

“Fibra ótika terrestre daudaun ne’e funsiona ona. Ezemplu;  servisu administrasaun Suai hakarak halo video konferénsia ho Lospalos, entaun sira bele uza ona infraestrutura fibra ótika”, Roberto hateten.

Vantajen husi  fibra ótika terrestre maka kustu, governu se la aloka orsamentu ho tinan-tinan atu selu operadór sira nia infraestrutura ba servisu governu, nune’e mós tempu  transasaun lalais liu tanba konsidera hanesan rede lokál.

“Ita sai na’in ba ita nia obra rasik, maibé uluk ita sempre uza ema seluk nian liña, maibé daudaun ne’e ita uza ona ita nia rasik no sai na’in ba investimentu ida ne’e”, esplika Roberto.

Nia mensiona mós katak, investimentu ne’e nudár proprietáriu Estadu nian, inklui seguransa ne’ebé iha ligasaun ho sentru ajénsia  nian, entaun ho sistema ida ne’e, timoroan rasik mak sei jere no asegura.Tanba ne’e, tuir Roberto, fibra ótika terrestre importante tebes tanba governu sei la gasta osan tinan-tinan hodi selu rede ba fornesimentu ligasaun ba munisípiu sira, funsionáriu sira iha edifísiu munisípiu 12 bele asesu rede lokál hodi hala’o atividade ho di’ak, hanesan asesu freebalance, Dalan ba Futuru inklui aplikasaun sira seluk ne’ebé rai iha sentru dadus ajénsia TIC Timor I.P.

Estabelesimentu ba projetu fibra ótika terrestre bazeia ba Dekretu Lei 29/2017 inklui mós atribuisaun sira seluk hanesan ajénsia ne’ebé responsabiliza infraestrutura governu nian iha fibra ótika, kria no implementa polítika no lei TIC inklui lei ba tranzasaun eletrónika, lei cyber security no lei ba privasidade ho seluk tan.

Jornalista: Zezito Silva

Editór: Francisco Simões

HAKEREK NO HATÁN

Please enter your comment!
Please enter your name here