Diretór Jerál Estatistika, Elias dos Santos Ferreira, Imajen/Egas Cristovão

DILI, (TATOLI)-Konta Nasionál Timor-Leste 2017 nian hatudu Produtu Internu Brutu (PIB) la’ós petrolíferu hetan negativu 3.5% bainhira kompara ho tinan 2016 nian iha pozitivu 5.1%.

Diretór Jerál Estatístika (DJE) Ministériu Finansa (MF), Elias dos Santos Ferreira, informa katak, iha PIB  negativu 3.5%  tanba PIB ne’e depende liu ba Orsamentu Jerál Estadu (OJE) 2017.

“Ita monu liuliu maka iha konstrusaun tanba uza duodésimu, gastu iha 2017 osan ladún sirkula tanba ne’e afeta ba GDP (gross domestic product) -3.5%”, hateten  Elias dos Santos Ferreira, ohin, iha Caikoli, Dili, hafoin halo lansamentu ba Konta Nasionál 2017, Dadus Emprezariál 2017 no Dadus Komérsiu 2017 kona-ba esportasaun no importasaun nian.

Vise-Ministra Finansa, Sara Lobo Brites, hatete estatístika ne’ebé kontein iha Konta Nasionál Timor-Leste nian ba 2000-2017 reprezenta konjuntu abranjente no konsistente konta makroekonómika nian ba informasaun, análize no peskiza, no mós ba objetivu elaborasaun ou desizaun polítika.

Konta Nasionál Timor-Leste 2000-2017 kompila ou bazeia ba Sistema Konta Nasionál Nasaun Unida 2018 nian.

“Publikasaun ne’e inklui set lubuk ida ne’ebé integradu husi konta inklui estimativa ba Produtu Internu Brutu ne’ebé kompila uza abordajen tolu maka hanesan produsaun, despeza no rendimentu. Estimasaun PIB kobre setór ekonómiku hotu-hotu, inklui setór petrolíferu no foka liu ba setór naun-petrolíferu, ho nune’e PIB setór naun-petrolíferu ba tinan 2017 ho kreximentu negativu 3.5% kompara ba tinan 2016 pozitivu 5.1%”, hateten Ministra Sara Lobo Brites.

Analista husi DJE,  Avelino Marçal, informa PIB 2017 tun ka negativu 3.5% tanba akontese impase polítika ne’ebé afeta ba ekonomia país iha tinan refere no mós impaktu husi despeza públiku ne’ebé tun ka -14.2% maioria husi investimentu públiku no konsome públiku no despeza parseiru dezenvolvimentu mós tun ka -12.6% no esportasaun bens no servisu tun ka -37.7% tanba hetan impaktu husi volume esportasaun kafé.

“Husi ajustamentu makroekonómiku ida ne’e nian hetan kompensadu husi komponente endójenu Produtu Internu Brutu nian hanesan despeza privadu nia sa’e 5.6% no importasaun ba bens no servisu tun 11.6%”, nia hateten.

Kona-ba parte despeza nian iha períodu trimestrál 2017 antes eleisaun, konsome públiku sa’e durante trimestre dahuluk no daruak, dirije husi empregadu públiku temporáriu, maibé investimentu públiku paradu iha trimestre daruak. Depois eleisaun konsome públiku hetan redusaun iha trimestre datoluk no dahaat, no investimentu públiku sa’e uitoan iha trimestre datoluk no tun fali iha trimestre dahaat. Parseiru dezenvolvimentu hetan redusaun iha trimestre datoluk no dahaat. Importasaun bens no servisu hetan redusaun maka’as depois eleisaun iha trimestre datoluk no dahaat.

Husi parte produsaun nian, PIB ne’ebé haree liubá valór adisionál iha 2017 tun 10.4% ne’ebé afeta husi valór adisionál husi indústria hirak ne’ebé envolve husi peskiza atividade emprezariál, maioria privadu, formál no pro-siklikal ne’ebé limita husi parte demanda hanesan konstrusaun tun 9.7%.

Iha indústria seluk ne’ebé la akumula iha peskiza atividade emprezariál, hanesan administrasaun públika, setór informál no kontra-siklikal hanesan agrikultura ne’ebé hetan kreximentu 1.3%.

Iha parte rendimentu nian, redusaun iha gross mixed income (rendimentu mistura), normálmente asosiadu ho rendimentu asosiadu uma kain iha agrikultór subsisténsia -5.5%.

Kompensasaun empregadu sa’e 6.6% dirije husi despeza públiku +10.4%. Aléinde ne’e lukru hetan redusaun -6.5%, espesialmente iha indústria sira ne’ebé kobre iha peskiza atividade emprezariál -12.5%.

Iha valór adisionál petrolíferu 2017 iha redusaun 15.8% ne’ebé afeta husi extrasaun volume petrolíferu (output) konsidera mínimu 8.4% iha 2017 kauza husi dezempeñu gas no líkidu ne’ebé tun gradualmente, maioria afeta husi presaun deflesaun menór ba naturál rezervatóriu. Iha parte seluk konsumu intermediáriu sa’e 8.8% ne’ebé barak liu kontribui husi kustu operasionál upstream.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here