Diretór Nacional Empregu SEFOPE, Lucio Beretaci dos Santos, Imajen/Egas Cristovão

DILI, (TATOLI) – Diretór Nasionál Empregu Sekretáriu Estadu Formasaun Profisionál no Empregu (SEFOPE), Lúcio Beretaci dos Santos, informa traballadór timoroan hamutuk 2.819 ne’ebé serbisu iha Austrália dezde 2012 to’o 2018 haruka ona osan milliaun $11.754.679.40 mai Timor-Leste.

Traballadór sira ne’e serbisu iha programa sazonál nian ne’ebé hala’o sira-nia knaar iha área rua mak ortikultura no ospitalidade.

Lúcio Beretaci dehan timoroan sira ne’e ne’ebé serbisu iha estranjeiru daudaun ne’e seidauk aplika taxa ba sira-nia rendimentu durante ne’e.

“Maibé ita hanoin ona oinsá bele kria baze legál ruma depois bele hetan ida ne’e ka lae? Mezmu serbisu estranjeiru, maibé ida ne’e hola parte taxa ba nasaun para halo buat ruma tanba to’o agora ita temi remittance (haruka osan), maibé seidauk iha serteza didi’ak, tanba osan ne’e sira haruka mai sira-nia família, maibé atu define loos taxa ba Estadu seidauk klaru”, Lúcio afirma ba TATOLI iha Kaikoli, ohin.

Tanba ne’e SEFOPE hahú iha tinan kotuk hanoin ona atu kria baze legál, kria taxa porsentu lima ka sanulu ba sira, maibé to’o agora seidauk.

“Ami levanta ona para ita-nia superiór, membru Governu sira hanoin oinsá maka bele estabelese ida ne’e. Karik nasaun (sira serbisu bá) fó taxa ba sira, maibé espesífiku ba Timór seidauk akontese”.

Lúcio afirma kona-ba remittance ne’e, SEFOPE koopera ho banku sira hodi buka hatene osan hira maka traballadór timoroan sira ne’e haruka mai kada fulan, nune’e tau iha baze dadus SEFOPE nian

Iha Timor-Leste funsionáriu ida bainhira hetan saláriu liu dolar 500 sei kontribui taxa porsentu 10 husi nia rendimentu ne’e, tanba ne’e Lúcio dehan timoroan sira ne’ebé serbisu iha estranjeiru ne’e bele estabelese ida ne’e ka lae?

“Iha 2019 exelénsia (SEFOPE, Julião da Silva) mós hanoin ona katak karik maluk sira ne’ebé serbisu iha Austrália, Koreia, mós iha nasaun hira atu asina MoU (nota entendimentu) iha tinan ida ne’e, Japaun, Kanadá, Malázia ho Irlanda karik sei estabelese duni, bele tau iha ne’ebá se traballadór iha ne’ebá nia bele hetan porsentu 10 ka 20 de’it, restu nia haruka mai Timór iha nia konta rasik, fila mai maka foin bele foti osan para halo buat ruma”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here