Koordenador Sosiedade Sivil Foun, Filipe da Costa

DILI,(TATOLI) – Primeiru Ministru (PM), Taur Matan Ruak, ohin,  nomeia ona Filipe da Costa, hodi substitui Joaquim da Costa Freitas, nudár  Koordenadór Unidade Apoiu ba Sosiedade Sivíl ne’ebé tutela iha Gabinete Primeiru Ministru (KUASS-GPM).

Komunikadu imprensa husi gabinete Primeiru Ministru relata katak, xefe governu indijita Filipe da Costa, sai KUASS ne’ebé tutela iha GPM, iha 1 Abril 2019, liuhusi despaxu númeru 09/PM/2019, 19 fulan Marsu 2019.

Gabinete Apoiu Sosiedade Sivíl dependénsia ba Primeiru Ministru, konforme previstu hosi alínea 1), númeru 4, artigu 12, Dekretu Lei númeru 14/2018, 17 Agostu. Tuir alínea c) númeru 2 hosi artigu 2 Diploma Ministeriál númeru 38/2016, 20 Jullu.

Kargu foun husi Filipe da Costa konsidera intensaun atu prosede reforma polítika públika nian ba apoiu sosiedade sivíl ne’ebé atu adopta ba estratéjia foun iha nia implementasaun, nune’e konsidera katak Filipe da Costa bele kaer aas no iha esperiénsia no domíniu ba konsepsaun, implementasaun no akompañamentu ba projetu sira apoiu sosiedade sivíl nian.

Filipe da Costa, durante ne’e nu’udar asesór ba Sosiedade Sivíl iha Palásiu Prezidente, hahú husi 2012 to’o 2017, no daudaun ne’e nu’udar Asesór ba Primeiru Ministru nian ba Seguransa Ai-han no Nutrisaun-KONSANTIL.

Jornalista: Zezito da Silva

Editór: Francisco Simões

HAKEREK NO HATÁN

Please enter your comment!
Please enter your name here