Uma Fukun Parlamentu Nasionál. Imajen/Espesiál

DILI, (TATOLI)–Kandidatu Estudante na’in ualu (8) ne’ebé sira nia naran la sai iha lista asesu ba Ensinu Superior Universidade Nasionál Timor Lorosa’e (UNTL), ohin, ba hasoru Komisaun B-Parlamentu Nasionál (PN) hodi hato’o sira nia lamentasaun.

Prezensa kandidatu estudante UNTL na’in 8 ne’e simu diretamente husi Deputada Albina Marçal Freitas, nudár Prezidente Komisaun G-PN ne’ebé trata ba asuntu Edukasaun, Juventude Kultura no Sidadania.

Iha tinan letivu 2019 ne’e, UNTL simu kandidatu estudante hamutuk ema 9187,  ne’ebé fahe ba kanál A (rejime jerál), kanál B (rejime oportunidade) no kanál C (rejime espesiál), maske nune’e, kontinua mosu lamentasaun husi kandidatu estudante sira ne’ebé sira nia naran la tama iha lista asesu ba UNTL.

 “Estudante sira hato’o lamentasaun katak sira naran la sai, espesífiku liu sira ne’ebé mak veteranu nia oan no sira hatudu sira nia dokumentu, maibé naran la sai”, hateten Deputada Albina iha sesaun plenária PN, hafoin simu lamentasaun husi estudante hirak ne’e.

Nia hateten, informasaun husi Ministru Ensinu Superior, Siénsia no Kultura, katak antes ne’e iha enkontru ida hodi deside Konsellu Jerál Administrasaun UNTL mak iha kompeténsia tomak atu foti desizaun ne’ebé hateten mós tenke simu kandidatu estudante hotu.

Lamentasaun ne’ebé Deputada Albina simu husi estudante lubuk hira ne’e katak, sira halo ona tentativu atu hasoru Magnífiku Reitór UNTL, maibé la konsege tanba Magnífiku Reitór iha atividade barak.

“Se dehan, Magnífiku Reitór no Konsellu Administrasaun UNTL deside atu simu, entaun tenke simu hotu, labele balun hela fali”, afirma Deputada Albina.

Informasaun seluk fali, Deputada Albina mós levanta iha plenária kona-ba kandidatu estudante balun hili fakuldade edukasaun, maibé sira nia naran  sai fali iha fakuldade medisina.

Iha fatin hanesan Deputadu Bankada PD, António da Conceição hateten, iha naran barak rejistadu iha UNTL tanba ne’e tenke fó justisa ba asuntu ne’e, dezde foti ona desizaun ida atu simu estudante sira hotu.

“Ita tenke buka hatene, rejistadu mak la simu ou sira hakarak aproveita situasaun ida agora daudaun. Hanesan deputadu ita tenke ezerse papél ne’ebé hatuur UNTL hanesan institutu públiku, hanesan parlamentu tenke fortifika UNTL rasik tanba instituisaun ne’e hanesan ita hotu nia orgullu”,  tenik Deputadu Antonio da Conceição.

Kuandu atu haree kandidatu sira ne’ebé mak seidauk simu, Antonio hatutan, tenke komprova mós katak sira em escritos ona ka seidauk para depois PN kuandu husu ba UNTL fó informasaun klaru.

Ministru Reforma Lejizlativa no Asuntu Parlamentár, Fidelis Magalhães, lia tun dehan,  kona-ba UNTL iha ona enkontru Konsellu Ministru ne’ebé tuir lei katak Konsellu Jerál Administrasaun UNTL tenke aprezenta sira nia proposta kona-ba lista kandidatu estudante.

“Ami sei konfirma fali ho Ministru Ensinu Superior, Siénsia no Kultura, hodi bele superviziona di’ak liután ba prosesu ida ne’e”,  hateten Ministru Fidelis Magalhães.

Jornalista: Julia Chatarina

Editór: Francisco Simões

 

 

 

 

 

1 KOMENTÁRIU

  1. Obrigadu ba Publikasaun ne’e. Tuir ha’u leitor ida ba Tatoli nian hato’o katak presiza fo balansu ba fonte informasaun signifika katak fonte kredivel husi UNTL nian la inklui. balansu laiha ou tanba tempu maka lato’o ka fatin maka dook liu. Minimu Reitor labele hatan, Proreitor Asuntu akademiku, Diretor Jeral aasuntu Akademiku, ka funsionariu sira ne’ebe obdese ba entri-data estudante sira-nian

HAKEREK NO HATÁN

Please enter your comment!
Please enter your name here