Ambulansia modernu rua ne'ebé entrega husi Ministru Estadu Prezidénsia Konsellu Ministrus, Hermenegildo Augusto Cabral Pereira, ba Prezidente RAEOA, Mari Alkatiri, ohin, iha Palásiu Governu. Imajen/Antonio Gonçalves

DILI,(TATOLI)-Governu da-ualu ne’ebé lidera husi Primeiru Ministru (PM), Taur Matan Ruak, ohin, oferese  ambulánsia modernu rua (2) ba povu Rejiaun Administrativa Espesiál Oe-cúse Ambeno (RAEOA).

Ministru Estadu Prezidénsia Konsellu Ministrus, Hermenegildo Augusto Cabral Pereira, ho Prezidente RAEOA, Mari Alkatiri, ohin, asina akordu hodi entrega ambulansia rua ba RAEOA iha Palásiu Governu. Imajen/Antonio Gonçalves

Karreta ambulánsia rua ho marka Toyota Land Cruiser ne’e entrega  husi  Ministru Prezidénsia Konsellu Ministru, Hermenegildo Augusto Cabral Pereira, ba Prezidente RAEOA, Mari Bin Amude Alkatiri, iha Palásiu Governu.

Karreta rua ne’e sosa husi nasaun Dubai ho tinan produsaun 2018 no ho orsamentu Estadu nian tinan fiskál 2018 ho valor rihun US$240.

“Ohin, ha’u mai simu ambulánsia ida modernu no kompletu, tanba ne’e presiza atu treinu ita nia kondutór no doutór sira atu akompaña ambulánsia ne’e”, hateten Alkatiri Alkatiri, ho orgullu bainhira simu ambulánsia husi Ministru Hemenegildo Pereira.

Alkatiri afirma, treinamentu ba ekipa ne’ebé atu uza ambulánsia no manutensaun presiza define didi’ak hodi kuidadu di’ak, tanba transporte Estadu ne’e hodi fó atendimentu di’ak liután ba povu.

“Ba orsamentu tinan ida ne’e hosi orsamentu Oe-cúse nian duni sei mai tan ambulánsia rua, hodi kompleta ambulánsia sira iha Oe-cúse”, hateten Mari Alkatiri.

Alkatiri hateten, oras ne’e iha RAEOA iha de’it ambulánsia rua (2) ne’ebé ho kondisaun grave atu atende transferénsia moras husi rejiaun haat (4) iha RAEOA, tanba ne’e, presiza duni ambulánsia 4 tan para atende transferénsia moras iha RAEOA.

Iha okaziaun hanesan, Diretór Jerál, Ministériu Prezidénsia Konsellu Ministru, Pedro Feno hatete, tuir loloos  ambulánsia rua ne’e sosa ho orsamentu hamutuk rihun US$158, maibé tanba tenke  kompleta ho ekipamentu maka atinje tiha to’o rihun US$240.

Biban ne’e,  Xefe Ambulánsia Ministériu Saúde, Doutór Nuno Vidal Soares hatete, ekipamentu   ba apoiu  ne’e kompostu husi monitor, eletrokál diagrama ba fuan, mákina hodi bomba ba korasaun bainhira pasiente hetan difikuldade orijen-té ba dada is ka respiratóriu.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here