iklan

NASIONÁL, EKONOMIA, INTERNASIONÁL, DEFEZA, DILI, MUNISÍPIU, OÉ-CUSSE (RAEOA), SAÚDE

TL ho UE Asina Akordu Kona-ba Mal Nutrisaun ho Asistensía Tekníka

TL ho UE Asina Akordu Kona-ba Mal Nutrisaun ho Asistensía Tekníka

Ministru Dionísio Babo Soares asina akordu ho Neven Mimica. Foto: MNEK

DÍLI, (TATOLI)-Governu Timor-Leste liuhosi  Ministériu Negósiu Estranjeiru no Kooperasaun (MNEK), foin lalais ne’e, asina ona akordu kooperasaun ho  Uniaun Europeia (UE) kona-ba mal nutrisaun ho asistensía tekníka.

Akordu ne’ebé asina direitamente hosi Ministru Negosiu Estranjeiru no Kooperasaun, Dionísio Babo Soares ho Komisáriu UE ba asuntus Kooperasaun Internasionál no Dezenvolvimentu, Neven Mimica, hala’o iha Apia, Samoa.

Komunikadu Imprensa hosi MNEK ne’ebé refere ba TATOLI, ohin, haktuir katak, hafoin asina akordu, Ministru Dionísio Babo Soares akompañadu hosi Diretór Interinu ba Organizasaun Rejionál, Fulgêncio Corbafo  no Adjuntu Ordenadór Nasionál, Ivo Valente, kontinua hala’o enkontru ho  Neven Mimica, atu fahe informasaun no hanoin kona-ba kooperasaun parte rua iha futurs, liliu bainhira Akordu Cotonou remata iha tinan 2020.

Komisaríu Neven Mimica louva Timor-Leste (TL) nia progressu iha demokrasia ne’ebé hala’o Eleisaun Prezidensiál no Parlamentár ho di’ak no susessu hanesan ezemplu diak ne’ebé TL bele halo atu hametin nia instituisaun demokrátika.

Komisáriu Mimica akresenta katak Uniaun Europeia sei apoia nafatin TL nia polítika no ekonomia liuhosi kooperasaun dezenvolvimentu bazea ba prioridade nasionál TL nian no programa dezenvolvimentu seitór Uniaun Europeia nian.

Uniaun Europeia mós sei fornese asistensia tekníka no halo dialógu polítiku atu hametin demokrasia iha TL, nomós prontu atu serbisu hamutuk oinsa diversifika ekonomia TL, liliu iha área agro floresta no apoia nesessidade bazíka iha área malnutrisaun ne’ebé sai mós hanesan prioridade nasionál.

Iha futuru, Uniaun Europeia promete sei fo apoiu ba seitór privadu ne’ebé bele hamosu impaktu boot ba dezenvolvimentu, liu-liu iha programa jenéru. Banku Investimentu Europeu bele finansia programa ne’e hanesan commetment Uniaun Europeia ba  relasaun polítika no ekonomia.

Ministru Dionísio Babo Soares expressa nia laran ksolok tanba bele asina akordu iha área rua ne’e, nomós hato’o nia gratidaun no apresiasaun profunda ba Uniaun Europea, tanba TL hetan benefiísiu hosi Fundu Europeu ba Desenvolvimetu (FED) liliu iha área boa governasaun, hanesan desentralizasaun iha governu nomós Parlamentu Nasionál no dezenvolvimentu rurál hanesan agrikultúra nomós estrada rurál, ikus mak apoiu orsamentu direta ba Ministériu Finansas, kona-ba programa Jestaun Finanseíru Públiku nian.

Nia mos  husu atu  Uniaun Europeia bele fo apoiu boot liután liuhosi 11 FED ba programa hamenus ki’ak no kualidade edukasaun iha TL tamba situasaun ida ne’e sai prekupasaun sentrál iha governu no povu TL.

Ministru Babo Soares mós fó hanoin katak TL nia prioridade hirak ne’e aliña ho estrutura finansiamentu Uniaun Europeia, maibé iha opiniaun la hanesan entre TL ho nasaun pasifíku seluk kona-ba prioridade rejiaun pasifíku nian. Ho kontestu ida ne’e, Ministru  husu atensaun husi Unian Europeia atu toma konsiderasaun.

Nune’e mós Ministru fahe informasaun kona-ba papél sosiedade sivíl no opozisaun ne’ebé forte tebes no TL nian esforsu atu halakon violénsia iha  uma laran, abuzu sexuál iha funsionáriu públiku, nomós dezafiu ne’ebé hasoru atu halakon violénsia hirak ne’e hanesan laiha konsiénsia no implementasaun lei ne’ebé seidauk diak nomós ema nia hanoin kona-ba asuntu hirak ne’e.

Iha oportunidade ida ne’e, Ministru Dionísio refere ba pilár 5 TL nian ne’ebé mós aliña ho estrutura finanseiru Uniaun Europeia nian iha kontexto post Cotonu 2020, ne’ebé sei tau prioridade ba dezenvolvimentu rurál, luta hasoru malnutrisaun, boa governasaun nomós luta ba kombate korupsaun.

Kona-ba investimentu seitór privadu, Babo akresenta katak asuntu ne’e presisa diskuti liután molok hetan apoiu formál hodi aumenta, hein katak TL bele hetan benefisiu diak liután iha programa liuhosi Akordo foun Post Cotonou nomós banati tuir Prioridade Nasionál no Meta Desenvolvimentu Sustentável (SDG – sigla Inglés).

Jornalista: Rafy Belo

Editór: Francisco Simões

iklan
iklan

Leave a Reply

iklan
error: Content is protected !!