TL-Austrália Extende Akordu Subsidiáriu R4D

0
99
Ministru Obras Públikas Salvador Soares dos Reis Pires Akompaña husi Embaixador Australia ba Timor Leste Peter Roberts Serimonia Asinatura Akordu Subsidiariu Programa Estrada Rural ba Dezenvolvimento (R4D) Faze Daruak iha Novo Turismo Dili, Kinta, (21/03/2019). Imajen/Egas Cristovão

DILI, (TATOLI) –Governu Timor-Leste liuhusi Ministériu Obras Públiku  ho Governu Austrália, extende hikas implementasaun subsidiáriu Programa Estrada Rurál ba Dezenvolvimentu (R4D-siglaIngles).

Konkordánsia ne’e hala’o liuhusi asina akordu estensaun entre Ministru Obras Públika, Salvador Eugénio Soares dos Reis ho Embaixadór Australia mai Timor-Leste, Peter Robert, ohin, iha Otél Novo Turismo, Dili.

Akordu estensaun ne’e ho durasaun to’o tinan 2021, ne’ebé sei konjuga ho programa governu tinan haat tuir mai atu kontinua reabilita no konstrui estrada nasionál por volta kilómetru 300, estrada munisipál kilómetru 400, no estrada rurál kilómetru 500.

“Espesífikamente ba estrada, VIII Governu nia misaun mak kontinua hametin konektividade fíziku iha territóriu tomak, atu asegura atividade ekonómiku, asesu ba merkadu povu nian no dezenvolvimentu sosiál”, hateten Ministru Salvador Pires.

Nia afirma katak, asesu ba estrada rurál importante ba populasaun sira atu estimula dezenvolvimentu ekonomia no sosiál iha área rurál, tanba menus asesu estrada rurál difikulta dezenvolve poténsia iha área produtiva sira hanesan turizmu, agrikultura, peska, saúde, edukasaun, no serbisu seluk tan.

“Razaun hirak ne’e Governu Timor-Leste estabelese ona parseria ho Governu Austrália no Organizasaun Internasionál ba Traballu (ILO) atu implementa programa estrada rurál ba dezenvolvimentu”, esplika Ministru Salvador Pires.

Total osan ne’ebé Governu Austrália kompromete ona iha programa R4D hamutuk millaun AU$62, liuhusi ILO atu fó asisténsia téknika ba dezeñu no supervizaun, inklui mós kapasitasaun ba setór públiku no emprezáriu lokál.

Governu Timor-Leste rasik mós liuhusi Orsamentu Jerál Estadu (OJE) kada tinan sei orsamenta millaun US$20 iha kapitál dezenvolvimentu ba estrada rurál no ba fundu infraestrutura tinan 2019 nian  prevee ona  millaun US$16,5.

Parte seluk Embaixadór Austrália ba Timor-Leste, Peter Robert hateten, estrada rurál ne’ebé di’ak signifika agrikultura sira bele fa’an produtu barak liután, inan isin rua bele ba klínika no oan sira bele ba eskola.

“Hahú tinan 2012, reabilita no halo manutensaun ba estrada rurál hamutuk kilómetru 552, reprezenta porsentu 27 husi estrada rurál iha Timor-Leste”, hateten Peter Robert.

Nia agradese ba Governu Timor-Leste ba kometimentu ne’ebé forte atu hadi’ak estrada rurál no ba Timor-Leste ho Australia nia relasaun ne’ebé forte.

Embaixadór Peter Robert esplika katak, programa R4D hanesan ezemplu kapás, oinsá nasaun rua ne’e bele serbisu hamutuk atu responde ba Timor-Leste nia meta ba dezenvolvimentu estratéjiku no espera parseiru ne’e bele kontinua iha tinan barak tan.

Iha etapa dahuluk Programa R4D hahú iha fulan Marsu tinan 2012 to’o 2017, etapa daruak hahú husi tinan 2017 to’o tinan 2019, no extende tan to’o Marsu tinan 2021.

R4D implementa ona husi Governu Timor-Leste liuhosi Diresaun Nasionál Estrada, Pontes no Kontrolu Cheias iha Ministériu Obras Públika (MOP) nia okos, ho nia alvu mak feto ho mane sira área rurál sei hetan benefísiu sosiál no ekonómiku husi asesu estrada ne’ebé hadi’ak ona.

Jornalista: Julia Chatarina

Editór: Francisco Simões

 

 

HUSIK IDA HATÁN