Tender 36 iha R4D Fó Oportunidade Ba Empreza Lokál

0
502
Ministru Obra Públika, Salvador Soares dos Reis Pires. Imajen dok. Tatoli

DILI, (TATOLI)– Ministru Obra Públika, Salvador Eugénio Soares dos Reis Pires,  enkoraja empreza lokál sira atu bele konkorre iha konkursu públiku (tender) 36 iha pakote subsidiáriu Programa Estrada Rurál ba Dezenvolvimentu (R4D-sigla Ingles) iha tinan 2019 nia laran.

“Biban ne’e ha’u hakarak konvida empreza lokál, liu-liu iha área rurál atu konkorre iha tenderizasaun 36 pakote estrada rurál iha tinan 2019 ne’ebé sei hahú iha fulan Marsu”,  apela Ministru Salvador Pires, iha nia intervensaun ba serimónia asina akordu estensaun subsidiáriu R4D, ohin, iha Otél Novo Turismo, Dili.

Nia hatutan, Ministériu Obras Públika (MOP) sei  kontinua Governu nia kompromisu ne’ebé prioritiza programa estrada rurál ba dezenvolvimentu nasionál no kriasaun empregu. Nia mós  agradese ba emprezáriu lokál sira tanba serbisu makas hodi bele asegura rezultadu obra ho kualidade, liuliu ba partisipasaun feto no dedikasaun ne’ebé hakarak kontribui ba dezenvolvimentu.

Programa R4D ne’ebé estabelese ona durante tinan hitu (7) hahú tinan 2012 to’o agora, liuhusi Organizasaun Internasionál ba Traballu (ILO-sigla Ingles), kapasita ona setór públiku hamutuk 498, husi funsionáriu governu no privadu hamutuk 750 hodi halo planu no  dezeñu implementasaun nian iha estrada rurál.

Programa R4D mós foka ba kriasaun empregu ba komunidade área rurál sira ne’ebé to’o agora kria ona hamutuk millaun 1,3 husi métodu serbisu mão da obra iha fatin sira ne’ebé apropriadu, akumula husi feto porsentu 30 no mane porsentu 70 no husi traballadór iha área rurál ne’e kontribui ona millaun $6,5 ba dezenvolvimentu ekonómiku.

Jornalista: Julia Chatarina

Editór: Francisco Simões

HUSIK IDA HATÁN