SEA Halo Konsultasaun Kona-Ba Ezbosu Lei Importasaun Saku Plástiku

0
33
SEA, Demétrio do Amaral de Carvalho, halo konsultasaun públika kona-ba ezbosu lei importasaun saku plástiku. Foto/Mídia SEA.

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, halo konsultasaun públika kona-ba ezbosu lei eliminasaun, produsaun, importasaun plástiku uzu úniku iha Timor-Leste ba liña ministeriál, emprezáriu balu no entidade interesada sira.

“Iha dokumentu ne’ebé ita prepara, ita hanoin katak lei ne’e sei tama efetiva presiza tempu uitoan para halo sosializasaun ba públiku”, Demétrio afirma iha Fatuhada ohin bainhira aprezenta ezbosu lei ne’e

Nia realsa: “Lei ne’e importante tebes tanba bainhira udan ita-nia ezgotu, tasi sira nakonu ho plástiku no lixu plástiku ne’e sai porsentu 20 husi totál lixu ne’ebé ita prodús, ita soe bá Tibar ne’e”.

SEA, Demétrio do Amaral de Carvalho, banhira koa’lia iha ámbitu konsultasaun públika kona-ba ezbosu lei eliminasaun, produsaun, importasaun plástiku uzu úniku iha Timor-Leste. Foto/Mídia SEA.

Tanba ne’e bainhira Timor-Leste la kombate lixu plástiku refere, peskiza hatudu 2050, porsentu 99 manu sira iha natureza sei han plástiku no tasi laran la’ós ikan maka barak, maibé plástiku maka sei barak liu.

Demétrio dehan ezbosu lei ida ne’e depois konsulta ba públika sei lori bá Konsellu Ministru depois aprezenta ba Prezidente Repúblika hodi hetan promulgasaun.

“Dekretu lei ida ne’e boot uitoan to’o artigu 80, tanba nia esplika husi definisaun aspetu sira ne’ebé kontein iha lei ne’e inklui mós dokumentu aneksu ida kona-ba lista sira ne’ebé ita bele importa mai Timor-Leste ka prodús iha Timor-Leste. Lista ne’e iha tipu plástiku 800 ne’ebé ita bele autoriza”, eis deputadu ne’e dehan.

Entretantu tipu sira ne’ebé la tama iha lista ne’e labele, mas ba kondisaun exesionál ba ema ka entidade ruma importa nia sei hetan taxa husi kustu báziku porsentu 30 husi valór ne’ebé nia sosa iha merkadu.

Kona-ba lista plástiku sira ne’ebé bele haruka mai Timor-Leste ne’e kímiku hotu, maibé nia prinsípiu maka sasán sira ne’ebé bele tama mai iha prinsípiu haat; dahuluk mak matéria ne’e bele dodok iha rai katak soe ba rai fulan tolu hanesan ne’e bele nabeen, daruak kutun sira rai bele han ka biodegradavel, datoluk bele rahun rasik iha natureza no ida importante maka la kontein materiál kímiku sira ne’ebé fó perigu ba saúde públika no ambiente.

Sekretáriu Estadu hatete sobre konsultasaun públika ba ezbosu lei ida ne’e sei halo dala ida ka rua tan no sei halo mós ba autoridade zona espesiál Oekusi, tanba lei ne’e aplika ba territóriu tomak.

Diretór Ezekutivu Luta Hamutuk, José Alves, hatete polítika zero plástiku ne’e di’ak tebes ba futuru nasaun atu sai moos, maibé dezafiu iha konsultasaun públika ida ne’e maka língua.

“Se dekretu lei ida ne’e atu implementa iha Timór tenke uza língua Tetun para ita bele entende, ita bele fó hanoin, kuandu ho portugés de’it, ha’u hanoin ne’e difikuldade ida, maibé iha prinsípiu lei ne’e di’ak. Agora, kestaun maka ami labele hato’o ami-nia hanoin ruma”, nia dehan.

Ba parte sosiedade sivíl haree katak lei bainhira iha, importante maka iha seriedade atubele halo implementasaun, halo kontrolu ne’ebé di’ak no tenke garante ba iha nia kontinuasaun.

José afirma xave importante liu maka investimentu tanba polítika no lei ne’e iha ona tenke investe mós osan atubele implementa lei ne’e.

“Ita apoia tanba polítika ne’e di’ak. Durante ne’e ita kestiona no problema barak ne’ebé mosu iha ita-nia rai, agora, kestaun ba ambiente ita hakarak Timór sai nasaun ne’ebé furak, moos, nune’e bele atrai ema husi rai seluk mai”.

José mós fó ezemplu balu kona-ba polítika Governu nian hodi hapara importasaun kafé Tugu Buaya tanba timoroan sira halo produsaun, maibé daudaun ne’e kontinua fa’an.

“Signifika seriedade husi ita-nia Governu ne’e ladún másima, ami espera katak ho lei ida zero plástiku bele la’o ho di’ak”.

Jornalista: Maria Auxiliadora

Editora: Rita Almeida

HUSIK IDA HATÁN