RI Kontinua Fó Atensaun Serbisu Adezaun TL Ba ASEAN

0
159
Embaixador Timor-Leste ba Indonézia, Carlos Alberto Xavier Pereira. Imajen/liputan6.com

JAKARTA, (TATOLI)—Estadu Repúblika Indonézia (RI) kontinua hatudu nia prontidaun no nia seriedade serbisu apoia Timor-Leste (TL) nia adezaun ba ASEAN (Association of Southeast Asian Nation-sigla Ingles).

Embaixadór Timor-Leste ba Indonézia, Carlos Alberto Xavier Pereira, fó sasin katak, komunikasaun Estadu Indonézia nian atu apoia Timor-Leste nia adezaun ba ASEAN di’ak no pro-ativu tebes tanba Indonézia konsidera Timor-Leste hanesan maun-alin no hanesan nasaun viziñu ne’ebé presiza tulun malu.

“Komunikasaun ita nian ho Indonézia praticamente furak tebes no Indonézia iha nia kometimentu para apoia adezaun TL nian ba ASEAN. Falta de’it mak ASEAN halo nia road mapatu apoia Timor prienxe kritéria sira ne’ebé mak membru ASEAN sira ezije”, hateten Embaixadór TL ba Indonézia, Carlos Alberto Xavier Pereira, ohin,  hodi responde TATOLI iha nia serbisu fatin, Embaixada TL nian iha Jakarta.

Diplomata Timoroan ne’e garante katak, bainhira Timor-Leste priense tiha kritériu sira ne’ebé nasaun membru Estadu ASEAN nian presiza, maka  loron ida sira ne’e aseita para Timor sai grupu estadu ASEAN nian.

Timor-Leste hato’o ona nia intensaun iha tinan hirak liu ba atu sai estadu membru ASEAN no momentu Repúblika Indonézia lidera ASEAN, Estadu Timor-Leste hatama kedas proposta atu sai membru ASEAN no altura ne’ebá Indonézia hateten kedas sira la iha problema.

Embaixadór Carlos Alberto, esklarese katak, prinsípiu husi organizasaun  Estadu ASEAN nian  mak konsensu, tanba ne’e, nasaun sira hotu ne’ebé hola parte iha membru estadu ASEAN nian aseita hotu ona mak  bele simu adezaun Timor-Leste nian.

“Nasaun ida mak seidauk konkorda tanba iha kondisaun balun mak sira ezije atu prienxe. Tanba ne’e mak ita nia Ministériu Negósiu Estranjeiru no Kooperasaun  mós iha diretór ida toma konta asuntu adezaun ita nian ba ASEAN no ita halo enkontru lubun ona ho ekipa  ASEAN nian ho halo vizita lubun mós mai sekretariadu ASEAN nian iha Jakarta hodi ko’alia ita nia adezaun ba ASEAN”, esplika Embaixadór Carlos Alberto.

Nia hatutan katak, komunikasaun Timor-Leste ho Indonézia di’ak tebetebes  apartir de Ministériu Negósiu Estranjeiru Indonézia nian ba iha ministériu sira seluk kapás tebetebes depois ba iha Prezidénsia Repúblika Indonézia mós di’ak tebes tanba sira koñese no hatene di’ak Timor-Leste.

Estadu Indonézia, tuir Embaixadór Carlos Alberto Xavier Pereira, halo buat barak, inkluzivamente apoiu ba eleva nivel rekursu umanus Timor-Leste nian iha area diplomasia ne’ebé fasilita Timor nia diplomata barak mai tuir enkontru barak atu bele transforma koñesimentu hodi prepara Timor-Leste sai membru estadu ASEAN.

Tuir observasaun pesoál Embaixadór Carlos Alberto nia   haree katak, dezde Timor Leste restaura nia independénsia iha 20 Maiu 2002 to’o mai 2019 ne’e nia kondisaun di’ak uitoan ona, no hanesan nasaun ne’ebé jiografikamente iha ASEAN nia laran iha kondisaun.

“Ita nia dezenvolvimentu tuir nasaun iha no ita nia dezenvolvimentu rekursu umanus tuir situasaun ne’ebé agora ita hasoru. Ita nia kometimentu halo dezenvolvimentu no loron ida ita tenke mínimu bele duni tuir nasaun sira seluk iha aspetu dezenvolvimentu infraestrutura, rekursu umanus tanba ita nasaun ida ne’ebé ekonomikamente bele moris no bele dezenvolve”, afirma Carlos Alberto.

Haree ba Timor iha kontextu nasaun, Embaixadór Carlos Alberto hateten, Timor nia nesesidade sira ne’e urjente hotu atu hetan atensaun, maibé presiza fo prioridade ba ida ne’ebé mak tenke halo uluk no ida ne’ebé mak tenke halo tuir mai.

Embaixadór Carlos Alberto hala’o nia misaun diplomata iha Indonézia hahú loron 30 Maiu tinan 2016 no mandatu ne’ebé fó ba embaixadór hothotu Timor-Leste nian periodu ida tinan tolu (3).

EKIPA

HUSIK IDA HATÁN