Negosiasaun Fronteira Terrestre TL-RI Sei Sai Ezemplár Ba Mundu

0
447
Embaixadór TL ba Indonézia, Carlos Aberto Xavier Pereira, ho Kounsulár Marcos da Costa, hasai imajen ho delegasaun Konsellu Imprensa ne'ebé vizita ba Embaixada TL nian iha Jakarta, Kinta (14/3/2019). Imajen/KI

JAKARTA, (TATOLI)—Negosiasaun delimitasaun fronteira terrestre Timor-Leste (TL) ho Repúblika Indonézia (RI) sei sai ezemplu di’ak tebes ba rai seluk iha mundu rai klaran.

Embaixadór Timor-Leste ba Indonézia, Carlos Alberto Xavier Pereira, hateten, serbisu negosiasaun fronteira terrestre ho Indonézia ne’ebé lidera husi Xefe Negosiador Prinsipál ba Delimitasaun Fronteira, Kayrala Xanana Gusmão, hatudu progresu ida avansadu no koletiva tebes tanba parte rua Indonézia ho Timor-Leste ativu tebe-tebes no hotu-hotu iha intensaun di’ak atu rezolve lalais.

“Embaixada hanesan de’it odamatan ba komunika  estadu Timor-Leste nia hakarak ba Indonézia no hatutan mós komunikasaun Indonézia nia hakarak ba Timor-Leste  observa katak parte rua ativu tebe-tebes atu rezolve lalais negosiasaun fronteira terrestre ne’e”, hateten Embaixadór Carlos Alberto Xavier Pereira, ba TATOLI, ohin, iha Mayapada Tower, Jakarta-Indonézia.

Diplomata Timoroan ne’e aprofunda katak, komunikasaun entre Gabinete Fronteira Terrestre Timor-Leste nian iha Dili ho Ministériu Negósiu Estranjeiru Repúblika Indonézia ativu tebe-tebes no diskusaun la’o  nafatin atu hetan solusaun ne’ebé adekuada b parte rua nia hakarak.

Tuir loloos, Embaixadór Carlos Alberto Xavier Pereira, informa katak, iha fulan Marsu nia laran ne’e, tékniku sira husi parte rua hasoru malu atu halo observasaun no ko’alia ho komunidade sira iha liña fronteira terrestre, maibé tanba dinámika polítika Indonézia nian atu besik  ba eleisaun prezidénsia maka Indonézia husu atu muda uitoan ba Abril, tinan ne’e.

Objetivu husi ekipa tékniku parte Indonézia ho Timor-Leste nian tuun ba terrenu atu haree no ko’alia ho povu atu sira bele hasai rekomendasaun ba Estadu ida-idak nia hodi bele rezolve lalais asuntu fronteira terrestre nian ne’e.

“Ita nia komunikasaun ho Indonézia fantástiku no iha vontade kooperasaun kapás tebe-tebes no kompriende malu ne’ebé dala ruma mós liu husi gia ofisíais no dala ruma mós  liu husi via  simples de’it tanba parte rua komprende malu di’ak tebes”, hateten Embaixadór Timor Leste ba Indonézia ne’e.

Pesoalmente, Embaixadór Carlos Alberto admira tanba prosesu negosiasaun ne’e la burokrasia liu tanba deit parte rua komprende no inteira malu di’ak tebes ho intensaun hanesan de’it, mak oinsá rezolve lalais no rezolve ho di’ak ba situasaun fronteira terrestre nian.

EKIPA

 

HUSIK IDA HATÁN