DILI, (TATOLI) – Ministru Estadu Prezidénsia Konsellu Ministru no Ministru Estadu Koordenadór Asuntu Ekonómiku (MEKAE), Hermenegildo Augusto Cabral Pereira, aprezenta ba Konsellu Ministru (KM) proposta kona-ba Akordu Espesiál Investimentu entre Repúblika Demokrátika Timor-Leste ho Pelican Paradise Group, Lda.
“Konsellu Ministru rona mós husi Pelican Paradise, projetu resort boot iha Tasi-Tolu, projetu ne’e la’o tinan 10 resin ona, neineik, ohin mai aprezenta projetu ne’e nia detallu balu inklui empregu ba timoroan sira no projetu ida ne’ebé ita bolu Akordu Espesiál Investimentu”, ministru dehan ba jornalista sira hafoin reuniaun KM iha Palásiu Governu, ohin.
Hermenegildo Augusto Cabral Pereira dehan KM rona, apresia no sei estuda kle’an didi’ak hodi haree oinsá mak atu hakaat bá oin apartir ohin loron nian.
Pelican Paradise, projetu ida ne’ebé ho investimentu privadu ida ne’ebé previstu milliaun $700 ba dezenvolvimentu kompleksu turístiku iha área ida maizumenus ektare 558, iha zona Tasi-Tolu no Tibar ne’ebé mós inklui unidade otelaria, kampu golf, área rezidénsia, sentru dezenvolvimentu ba joven sira, eskola internasionál, ospitál internasionál no sentru komersiál.
Kompleksu turístiku ida ne’e maka fó dalan ba kriasaun postu traballu 1500 iha faze konstrusaun, postu serbisu permanente 1300 durante konstrusaun no re-florestasaun porsentu 80 iha projetu nian.
Sobre proposta Akordu Espesiál Investimentu ida ne’e membru Governu sira sei kontinua analiza.
Lee mós : http://www.tatoli.tl/2018/01/timor-leste-atribui-ona-sertifikadu-investimentu-ba-pelican-paradise/
Jornalista: Maria Auxiliadora
Editora: Rita Almeida
