MD Simu Orientasaun Hodi Hametin Relasaun Ho Austrália

0
51
Ministru Defeza no Ministru Interino Seguransa, Filomino Paixao. Imajen/Antonio Goncalves

DILI, (TATOLI) – Ministru Defeza no Ministru Interiór Interinu, Filomeno Paixão, ohin simu orientasaun hosi Primeiru-Ministru, Taur Matan Ruak, hodi hametin relasaun bilaterál ho nasaun viziñu Austrália liuliu kooperasaun iha área militár bainhira vizita nasaun ne’e iha sabadu semana ne’e.

“Orientasaun maka tenke servisu di’ak ho ita nia viziñu, ho Austrália ita tenke iha kooperasaun di’ak, liuliu seguransa iha rejionál”, dehan Governante bainhira simu orientasaun ne’e iha Palásiu Governu, ohin.

Tuir planu ministru defeza ne’e sei destaka ba nasaun Kangrú ne’e iha sabadu semana ikus ne’e bazeia ba konvite hosi ninia omólogu Australianu hodi diskute kooperasaun iha área militár.

Durante vizita loron tolu sei  observa mós prosesu fábrika ba ró rua ne’ebé governu Austália sei oferese ba instituisaun F-FDTL, liuliu komponente navál hodi halo patrullamentu iha kosta súl hodi asegura seguransa ba povu no peska ilegál.

Nune’e mós diskute ho ministru defeza Austrália kona-ba tipu apoiu ró ho ninia espesifikamente hodi prepara rekursu umanu inklui manutensaun ró durante tempu naruk.

Governante sita kooperasaun bilaterál entre nasaun rua la’o di’ak, tanba ne’e sei reforsa liután.

Durante ne’e Austrália fó apoiu maka’as ba instituisaun F-FDTL, liuliu formasaun rekursu umanu, tanba ofisiál F-FDTL pur volta na’in lima hasai ona majistradu iha iha área jestaun no lojístiku nomos apoiu seluk tan.

Jornalista: Agapito dos Santos

Editora: Rita Almeida

HUSIK IDA HATÁN