iklan

NASIONÁL

MD Hahú Identifika Pesoál Troka Komisáriu PNTL

MD Hahú Identifika Pesoál Troka Komisáriu PNTL

Ministru Defeza no Seguransa, Filomeno da Paixão de Jesus. Imajen TATOLI/António Goncalves

DILI, (TATOLI) – Ministru Defeza no Ministru Interiór Interinu, Filomeno Paixão, hatete identifika ona pesoál hosi Polísia Nasionál Timor-Leste (PNTL) ne’ebé prienxe rekizitu  atu asume kargu komisáriu hodi troka Júlio da Costa Hornay no adjuntu Faustino da Costa.

Komisáriu no adjuntu komisáriu sei termina mandatu iha loron 27 marsu 2019 hafoin asume pasta ne’e iha loron 27 marsu 2014.

“Ha’u iha lista hotu, sé mak ba eskola ona, hasai kursu kona-ba defeza seguransa, komportamentu di’ak  no laiha problema ho justisa, dadus iha hotu ha’u nia liman hodi lori ba konsellu ministru”, dehan nia ba jornalista sira iha Palásiu Governu, ohin.

Nia hatete PNTL seidauk iha feto maka prienxe seniór idade kursu hodi asume kargu komisáriu bazeia ba publikasaun mídia sosiál ne’ebé públika  mós kandidata feto ba kargu refere.

“Tuir lista ne’ebé ha’u haree ba iha seniór idade kursu seidauk iha feto maibé bele iha tinan haat tan maka iha feto”, katak nia.

Hatán kona-ba nomeasaun ema sivíl ba lidera  instituisaun PNTL, ministru ne’e hatete laiha planu, tanba instituisaun PNTL iha ona rekursu sufisiente ne’ebé prienxe rekizitu hodi asume kargu ne’e.

“Ita sei hili ema hosi laran, tanba sira iha ema para atu sae dunik ba komisáriu, ita lalika nomeia ema hosi li’ur hodi tuir sistema iha laran, halo tuir lei no prosedimentu”, dehan Ministru.

Entretantu ministru ne’e sei kontinua hein nafatin lista ne’ebé nomeadu hosi konsellu defeza no seguransa hodi aprezenta ba konsellu ministru ne’ebé tuir prazu tempu tenke aprezenta ona iha loron 8 marsu 2019.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!