KI ho LBH Pers Aseita Promove Advokasia Ba Liberdade Imprensa

0
129
Prezidente KI, Virgílio Guteres ho Diretór Ezekutivu LBH Pers, Ade Wahyudin, Kita (14/3/2019), selebra akordu kooperasaun. Imajen/KI

JAKARTA, (TATOLI)—Konsellu Imprensa (KI) ho Lembaga Bantuan Hukum (LBH) Pers, Indónesia, aseita malu hodi serbisu hamutuk atu promove advokasia ba prinsípiu liberdade imprensa no espresaun.

Konkordánsia ne’e aprofunda  liuhusi asina nota entendimentu no akordu kooperasaun  entre Prezidente Konsellu Imprensa (KI) Timor-Leste, Virgílio da Silva Guterres, ho Diretór Ezekutivu Lembaga Bantuan Hukum (LBH) Pers, Ade Wahyudin, ohin, iha Jakarta-Indonézia.

Akordu serbisu hamutuk ida ne’e nia objetivu mak fortalesimentu institusionál no dezenvolvimentu rekursu umanu Konsellu Imprensa Timor-Leste liuhusi formasaun no estájiu serbisu iha área advokasia ne’ebé iha relasaun ho liberdade imprensa no liberdade espresaun.

Inísiu kooperasaun ne’e fo biban ba funsionáriu KI nian na’in neen (6) atu bele hahú formasaun no estájiu iha LBH Pers, Jakarta, iha  fulan Jullu, tinan ne’e.

“Ami apresia tebes ho inisiativa Konsellu Imprensa Timor-Leste nian atu oinsá mak ita kolabora malu nudár parte ida mós atu ami dezenvolve ami nia liña komunikasaun iha rai laran no rai li’ur”, hateten diretór ezekutivu LBH Pers, Ade Wahyudin, durante halo diskusaun ho KI.

Ade Wahyudin subliña katak, maske kooperasaun halo ho LBH Pers, maibé LBH Pers sei komunika mós ho nia parseiru sira atu oinsá mak ajuda malu hodi fó fó kapasitasaun no transforma koñesimentu ba malu iha area advokasia ba profisionál jornalista ho asosiasaun jornalista sira, hodi promove liberdade imprensa no liberdade espresaun.

LBH Pers nudár organizasaun noun profit ne’ebé harii iha tinan 2003 husi antigu jornalista husi AJI (Aliansi Journalist Independent-siglaIndonézia) no mós advogadu foin-sa’e sira, ho intensaun atu fó advokasia ba asuntu liberdade imprensa no liberdade espresaun iha Indonézia.

Biban ne’e, Prezidente KI, Virgílio da Silva Guterres, hato’o mós  KI nia agradesimentu tanba ho komunikasaun ne’ebé natoon de’it, mas LBH Pers hatudu nia vontade ho profunda tebes hakarak kolabora ho  KI atu fasilita kapasitasaun rekursu umanus no fahe koñesimentu ba malu iha area advokasia ba liberdade imprensa no liberdade espresaun.

Ho atividade estájiu ida ne’e, KI espera katak bele iha rekursu ne’ebé matenek atu hala’o advokasia ba polítika ne’ebé iha relasaun ho liberdade imprensa no liberdade espresaun no oinsá atu hametin relasaun ne’ebé di’ak ho autoridade makaer fukun hodi promove liberdade imprensa no liberdade espresaun.

Sasin sira ba asinatura akordu serbisu hamutuk LBH Pers ho KI nian ne’e, kompostu husi parte KI nian; Konselleiru José Ximenes, Konselleiru Paulo Araújo, Konselleiru Francisco Belo Simões da Costa, ho mós Asesór Programatiku Rigoberto Monteiro, no husi LBH Pers mak hanesan Diretór Divizaun Advokasia no Peskiza, Gading Yonggar Ditya, Erwin Natosmal, nudar advogadu, Ahmad Fathanah Haris, nudár staff advokasia nian,  Fira Abdurachan husi AJI Jakarta, ho mós staff ezekutivu LBH Pers nian.

EKIPA

 

 

HUSIK IDA HATÁN