DJE ho BM Lansa Mapeamentu Ki’ak Sensivel Ba Jéneru

0
103
Foto lansamentu relatóriu kona-ba Mapeamentu Ki’ak Sensivel ba Jéneru. Foto/ Mídia MF.

DILI,(TATOLI)–Diresaun Jerál Estatístika (DJE) husi Ministériu Finansa (MF) ho kolaborasaun servisu husi Banku Mundiál, ohin, lansa ona relatóriu kona-ba Mapeamentu Ki’ak Sensivel ba Jéneru.

Relatóriu ne’e ho intensaun bele ajuda Governu atu trasa polítika hamenus ka erradika ki’ak iha Timor-Leste. Vise-Ministra Finansa, Sara Lobo Brites, hateten, relatóriu ne’e bele iha liu informasaun barak atu ajuda hatuur programa governu nian iha tinan sira tuir mai hodi bele redús ki’ak ba persentajen ida ne’ebé tuir VIII governu nia planu.

Mapa Pobreza. Imajen/Egas Cristovão.

Polítika governu ne’ebé lidera husi Primeiru Ministru (PM), Taur Matan Ruak, mak hakarak redús ki’ak porsentu 10 iha periodu 2018-2023.

Tuir Ministra Finansa ein ezersísiu ne’e katak, dadus ne’e hatudu  populasaun  parte Leste ho Oeste, ki’ak barak liu iha parte Oeste.

 “Ita haree mean barak iha ligasaun ho komparasaun ne’ebé hatudu ki’ak barak liu parte Oeste, entaun ida ne’e informasaun ne’ebé di’ak tebes ba polítika governu nian para oinsá konsentra duni iha programa redús ki’ak iha fatin ne’ebé maka nivel ki’ak aas”, hateten Sara Lobo Brites.

Nia hatutan, hafoin Timor-Leste hetan nia independénsia, DJE-MF servisu hamutuk ho Banku Mundiál, halo ona sondajen ka peskiza kona-ba kondisaun moris iha Timor-Leste.  Peskiza ida ho naran Timor-Leste Survey of Living Standard (TLSLS), peskiza hirak ne’e halo iha tinan 2001, 2007 no 2014. Informasaun ne’ebé hetan husi peskiza hirak ne’e maka uza hodi halo análize kona-ba kondisaun moris populasaun nian iha Timor-Leste.

Iha 2015, governu uza ona dadus husi TLSLS 2014, hodi halo análize kona-ba kondisaun moris iha Timor-Leste. Rezultadu análize hatudu katak, bainhira uza liña ki’ak nasionál, persentajen populasaun ne’ebé sei moris iha kondisaun ki’ak tun ba 41.8% iha 2014, kompara ho 50.4% iha 2007. Iha parte seluk, bainhira uza liña ki’ak internasionál, persentajen populasaun ne’ebé sei moris iha kondisaun ki’ak ka mukit tun ba 30.3%.

Relatóriu Sensu Populasaun no Uma Kain 2015 hatudu katak totál populasaun hamutuk 1,183,643, ho 30% hela iha área urbana no 70 % hela iha área rurál, no nivel kreximentu populasaun kada tinan 2.1%.

“Relatóriu ki’ak 2014 nian aprezenta de’it rezultadu análize kona-ba kondisaun moris iha nivel nasionál, rejionál no munisípiu. Maibé, atu ajuda governu hodi halo polítika redusaun ki’ak ne’ebé’ di’ak liu, ita tenke hatene fatór kauza ki’ak no dimensaun ki’ak iha nivel suku, jéneru no juventude”, hateten Sara Lobo.

Bazeia ba prestasaun Governu hodi hatún ki’ak besik persentajen 9 durante períodu 2007-2014, nune’e VIII governu define nia alvu redusaun ki’ak ba persentajen 10 durante nia mandatu. Atu atinje ka hetan meta ida nee, análize ne’ebé ajuda governu hodi hatene kauza no dimensaun ki’ak iha nivel hotu-hotu, importante tebetebes hodi ajuda define polítika públika no implementa programa redusaun ki’ak ne’ebé efetivu.

“Relatóriu kona-ba Mapeamentu Ki’ak Sensivel ba Jéneru ne’ebé ita lansa ohin, hola parte integrante ba polítika no programa ne’ebé governu ne’e define ona. Ho relatóriu ida nee, ita hatene liután kona-ba kauza no dimensaun ki’ak ba jéneru, liuliu iha nivel suku”, Sara Lobo dehan tenik.

Rezultadu prinsipál husi análize Mapeamentu Ki’ak Sensivel ba Jéneru hatudu katak laiha diferensa ka “Gap” (lakuna) ne’ebé boot entre joven feto no mane asesu ba edukasaun, no joven feto ho idade eskolár ne’ebé própriu iha tendénsia atende eskola kompara ho mane. Ida nee hatudu eskluzividade iha edukasaun bazeia ba jéneru.

“Ita mós nota katak estudante feto sira iha área rurál hetan oportunidade ne’ebé limite kompara ho nia maluk estudante feto sira iha área urbana”, Sara Lobo hateten.

Iha parte saúde nian, rezultadu análize hatudu katak laiha korrelasaun ou relasaun ne’ebé metin entre diferensa iha jéneru (feto no mane) asesu ba servisu saúde ho ki’ak, signifika katak laiha diferensa entre feto no mane asesu ba servisu saúde ho sira-nia kondisaun moris.

Rezultadu seluk maka feto iha tendénsia la bá buka servisu kompara ho mane, no iha área sira ne’ebé atividade ekonómika la’o di’ak, iha diferensa boot entre feto ho mane hodi partisipa iha forsa traballu.

Sara Lobo subliña tan katak, rezultadu análize husi Mapeamentu Ki’ak Sensivel ba Jéneru sei ajuda  governu no parseiru dezenvolvimentu hodi hatene ho kle’an kona-ba kauza no dimensaun ki’ak ka mukit iha Timor-Leste, liuliu iha área rurál. Mune’e parte rua bele kontinua servisu hamutuk hodi hamenus ki’ak bazeia meta ne’ebé governu trasa ona.

Nia husu ba instituisaun rua; DJE-MF ho Banku Mundiál, atu halo sosializasaun, sensibilizasaun no publikasaun ba relatóriu ne’e ho entidade relevante, no kontinua servisu hamutuk hodi halo análize ne’ebé komprensivu kona-ba kauza no dimensaun ki’ak bazeia ba dadus TLSLS 2014 nian, no mós halo peskiza TLSLS foun hodi atualiza informasaun kona-ba kondisaun moris povu nian.

“VIII Governu komprometidu atu promove polítika bazeia ba evidénsia, nune’e peskiza no análize hirak hanesan ne’e sei kontinua hala’o iha futuru. Tanba Governu fiar katak informasaun nu’udar koñesimentu no informasaun nu’udar solusaun”.

Diretór Jerál Estatístika, Elias dos Santos Ferreira, aprofunda liu tan,  relatóriu mapa pobreza sensivel ba jéneru foti husi fonte Timor-Leste Living Standar Survey 2014-2015, Sensu Populasaun Uma Kain 2015 no Peskiza Demografia Saúde iha Timor-Leste 2016 no husi relatóriu tolu ne’e kompila hamutuk maka fó sai rezultadu, maibé iha formatu mapa.

“Ida ne’e ita la’ós halo peskiza foun, ita halo analiza ba dadus ne’ebé iha ona. Relatóriu ne’e ita tau hamutuk depois tau iha mapa para fasil para ema atu komprende”.

Kona-ba ki’ak iha parte Oeste barak liu, Elias Ferreira hatutan, tenke iha metodolojia ida klaru no bainhira haree ba nivel nasionál iha 2007, peskiza daruak nian iha 50.4% Timor-Leste tun ba 41.8% 2014 no iha nivel internasionál tun ba 47.2% tun ba 30.3%.

“Se ita haree ba munisípiu balun ne’ebé persentajen boot, balun ki’ik, maibé se ita liga liubá suku, iha balu maka kór mean barak liu, portantu, iha ne’e Ermera ki’ak mós barak tanba ita haree ba metodolojia ne’ebé ita uza ita tenke haree ba konsumu ema ida tenke loron ida han 2100 kilo kalori. Tenke iha kondisaun uma ne’ebé di’ak, iha kuartu rua, ita konsumu ba televizaun, mobile phone”, nia esplika.

Elias Ferreira hatutan, dalaruma ema husu tanba sá maka Ermera kafé barak, maibé ki’ak. Tanba kuandu kafé ne’e tinan ida, fulan tolu ku’u hotu no hein fali tinan oin ku’u fali, maka tenke analiza ida ne’e.

Aléinde iha Ermera, Elias Ferreira informa katak, iha mós Oekusi  tanba peskiza ne’ebé halo iha tinan 2014-2015, projetu Oekusi ne’e foin tama iha 2015, peskiza halo tiha maka projetu boot foin tama.

Jornalista: Maria Auxiliadora

Editór: Francisco Simões

 

HUSIK IDA HATÁN