Bali, “Paraízu” Ki’ik Mak Haksumik Iha Mundu Rai Klaran

0
205
Pura Tanah Lot, nudár fatin turístiku ida iha Bali ne'ebé koñesidu no fantástiku. Imajen/google

BALI, (TATOLI)—Bali, la’ós ona illa ne’ebé foun ba ema ua’in sira ne’ebé tama-sai ba Indonézia husi mundu rai klaran. Bali koñesidu tebes ho nia poténsia turístiku ne’ebé oferese rendimentu ida espetakulár  ba ekonomia Estadu Indonézia nian.

Tanbasá mak Bali sai hanesan distinsaun turizmu favoritu iha mundu? Tuir ema ua’in sira nia sasin husi ibun ba ibun ne’ebé vizita Bali hateten, Bali hanesan illa ikon turizmu Indonézia nian, maibé seluk fali mós hateten, hori uluk no hori ua’in kedan Bali koñesidu iha mundu rai klaran nudár  fatin distinsaun turizmu fantástiku ho nia paizajen natureza tasi, foho, lisan, infraestrutura tradisionál, kulinária tradisionál, no ho ninia emar sira nia umildade. Ema balun fali saran Bali hanesan “Paraízu” ki’ik ne’ebé haksumik iha mundu rai klaran.

Ema se de’it mak iha ona esperiénsia vizita ba Bali ou transit de’it iha Bali hodi hakur liu ba rai seluk, sempre iha nia “nostaljia” rasik,  sente Balinese sira nia laran luak ho sira nia maneira serbí ema ua’in sira iha Bali.

Entrada de’it iha Aeroportu Internasionál Gusti   Ngurah Rai, ema ida-idak bele sente ona Balinese sira nia  maneira serbí ne’ebé bele dehan, refleta  karaterístika ámbitu moris iha Illa Bali nian, husi rai ikun to’o rai ulun.

Ho oin midar, hamnasa, no taka liman, nudár mós  ábitu  ida ne’ebé atrai bainaka sira nia laran no konfiansa hodi garante hakmatek ba bainaka no ema sira vizita iha  Balinese sira nia uma no sira nia rain.

Bele dehan, Bali nia furak la’ós tanba de’it paizajen turístiku, maibé fundamentu mós mak Balinese sira nia lisan moris simu ema no sira nia ospitalidade.

“Simu ema ho oin midar, respeitu malu, no fiar malu, hanesan ona doutrina moris ne’ebé ami komunga nanis husi ami nia bei-ala sira. Ida ne’e mak talvés halo ami fiar an no úniku ho komunidade sira seluk nia moris loroloron nian”, hateten Gusti, Balinese ne’ebé dada lia ho TATOLI iha Otel Ayodya, Nusa Dua, Bali.

Nia mós lia tun dehan, hanesan Bali oan, nia orgullu ho nia sosiedade tanba mundu hatene Bali la’ós Bali nia poténsia turístiku de’it, maibé mós mundu fiar iha Bali oan sira nia  onestidade, umildade no haraik an.

Bali hanesan Illa ida iha Indonézia ne’ebé koñesidu duni ho fatin turístiku ne’ebé atrativu no fantástiku. Tanba ne’e, loron ba loron, ema ua’in husi mundu rai klaran, nadodon vizita ba Bali atu buka hakmaan an no fó ksolok ba moris.

Oinsá ho istória Bali nian to’o koñesidu hanesan fatin turístiku famozu iha mundu?  Tuir publikasaun oi-oin iha situs online mai ho versaun barak tebes. Tuir bobo.id nia edisaun balun fó sai katak,  iha sékulu ba dala-20 nian Bali hetan invazaun totalmente husi Olanda. Momentu ne’ebá, ema lubun husi Eropa komesa vizita Bali nudár aliserse ba turista sira vizita Bali.

Entre tinan 1920, barku komérsiu Olanda nian, KPM (Koninklijke Pakecart Maatskapy) liu husi Indonézia ne’ebé atraka  iha Portu Buleleng, Bali no lori turista ua’in husi Eropa. No fou-oun barku sira liu ho intensaun atu halo atividade komérsiu, maibé tanba nesesidade barak liu iha Portu Buleleng, distinsaun barku nian modifika tiha Portu Buleleng sai tiha Bali Express.

Husi atividade komérsiu ne’e haforsa estabelese hikas domisíliu turizmu primeiru iha Bali ho naran “Official Tourist Bierau” iha tinan 1924. Hahú husi ne’ebá, turista sira Eropa nian, inklui delegasaun boot seniman  Eropa mai vizita ona Bali no fila ba sira nia rain hodi konta ibun ba ibun kona-ba Bali nia furak, tanba ne’e, Bali nia naran komesa famozu iha Eropa.

Ho turista sira nia ánimu ba Illa Bali halo ema barak saran títulu Bali  oi-oin. Balun dehan Bali The Island of Gods, The Island of Paradise, The Island of Thousand Temples, The Morning of the World, no ho apresiasaun oi-oin tan.

Bali iha nia objetu turístiku hamutuk 25 ne’ebé fantástiku no atraitivu. La kompleta  nia viajen iha Bali, bainhira  la ba vizita fatin turístiku hirak ne’e, kompostu husi;  fatin turístiku Kuta Bali, Pura Tanah Lot, Ubud Bali, Kintamani Bali, Sanur Bali, Nusa Dua, New Kuta Green Park,  Merkadu Sukawati, Inur Padang, Lagoa Beratan Bedugul Bali, Garuda Wisnu Kencana (GWK), Inur Lovina, Pura Besakih, Pura Uluwatu, Pantai Jimbaran, Sangeh Monkey Forest, Tanjung Benoa, Inur Dreamland, Lagoa Batur Kintamani, Tari Kecak Uluwatu, Arung Jeram Sungai Telaga Waja, Arung Jeram Sungai Ayung, Tampak Siring Bali, Largo Ayun,  ho mós fatin turístiku Jatiluwih.

Bali mós oferese sira nia poténsia kulinária tradisionál ne’ebé atrai tebes ema nia vontade atu koko no sira iha abilidade kulinária hodi transforma ai-han lokál  tuir postura no karaterístiku  kulinária internasionál.

EKIPA  

HUSIK IDA HATÁN