ADTL Husu MSSI Aprezenta Dekretu Lei Kona-ba Defisiénsia Ba Konsellu-Ministru

0
123
Diretór Ezekutivu ADTL, Cesario da Silva. Foto FB: Dize Cesário Adhabel

DILI, (TATOLI) – Asosiasaun Defisiente Timor-Leste (ADTL) ne’ebé kompostu husi RHTO, ETBU (East Timor Blind Union), Klibur Domin no seluk tan husu ba governu, inkluzivamente MSSI (Ministériu Solidariedade Sosiál no Inkluzaun) atu lori lalais esbosu Dekretu Lei Konsellu Nasionál ema ho defisiénsia ba Konsellu-Ministru atu bele aprova no bele estabelese Konsellu Nasionál ema ho defisiénsia.

“Ida ne’e ezijénsia tinan barak ona ita ko’alia. Ho ida ne’e liga kedas ho ratifikasaun konvensaun ba ema ho defisiénsia. Ida ne’e mós ita ko’alia tinan barak ona hodi husu bebeik ba Ministériu Solidariedade Sosiál no Inkluzaun atu lori ona kestaun ne’e ba Konsellu-ministru”, haktuir Diretór Ezekutivu ADTL, Cesario da Silva, iha edifísiu Ra’es Hadomi Timor Oan (RHTO), ba Ajénsia TATOLI iha Lahane Orientál, ohin.

Diretór Cesario da Silva reforsa, konvensaun sira seluk governu no estadu Timor-Leste ratifika ona só konvensaun ida ne’e nafatin, iha nafatin resposta oioin mai husi governante sira; barak liu organizasaun oioin husu, iha resposta oioin, tanbasá seidauk ratifika?

“Nune’e organizasaun defisiénsia sira hotu, ami nafatin ezije, liliu ba Ministériu Solidariedade Sosiál no Inkluzaun atu lori ona esbosu dekretu lei Konsellu Nasionál ba direitu ema ho defisiénsia no ratifikasaun ba Konsellu-ministru, atu diskute no bele estabelese konsellu no ratifika konvensaun direitu ba ema ho defisiénsia”, hateten Ezekutivu ADTL, Cesario da Silva.

Alumni Universidade Dili (UNDIL) ne’e akresenta sira-nia observasaun durante ne’e seidauk konkretiza tanba kestaun vontade lider polítiku no governante sira nian atu lori prosesu ne’e ba oin.

Nia hatutan ezemplu kona-ba Konsellu Nasionál, ita hein de’it vontade husi Ministériu Solidariedade Sosiál atu lori ba Konsellu-ministru tanba preparasaun ba esbosu lei ne’e, halo konsultasaun, hetan mós apoiu husi organizasaun sosiedade sivíl, Asosiasaun ho nia membru sira hamutuk ho governu rasik ba halo konsultasaun nível rejionál hodi hetan opiniaun sira kona-ba konsellu ida ne’ebé mak ita hakarak.

“Entaun iha hotu ona, esbosu lei ne’e iha ona Ministériu Solidariedade nia meza, hein de’it ona vontade polítika atu lori ba diskute”, afirma.

Fontes hanesan akresenta mós katak liga ho implementasaun ODS (Objetivu Dezenvolvimentu Sustentável), Timor-Leste mós ratifika, iha ne’e iha nia lema ida “Leave Noone Behind” ka La Husik Ema Ida Iha KotuK no durante sira mós akompaña prosesu.

Implementasaun ODS iha Timor-Leste husi organizasaun ema ho defisiénsia rekoñese durante ne’e sira lakon informasaun.

“Primeiru kona-ba ODS ne’e rasik, to’o ikus ita foin hatene katak avansa ona ba relatóriu foin ita entende. Maibé, ita halo kontribuisaun lubuk ida ona ba implementasaun ODS, porezemplu ODS númeru quarto ita ko’alia kona-ba edukasaun ho kualidade di’ak”.

“Ita-nia kontribuisaun ne’e mak liuliu ita lori mós defisiénsia ba eskola, edukasaun inkluziva iha ita-nia prosesu oinsá prepara ema ho defisiénsia partisipa iha edukasaun formál sira. Entaun, ita-nia kontribuisaun sira ne’ebé mak iha, ita kontribui tebes”, reforsa.

Maske nune’e, tuir nia iha implementasaun liliu ba governu ne’e mak difikulta. Polítika di’ak maibé iha implementasaun mak difikulta ba organizasaun ba ema ho defisiente sira.

“Ami bele dehan, ba ODS ne’e, informasaun sira ne’e ami la intende, organizasaun hotu la intende, atu halo ona relatóriu mak foin intende prosesu ne’e”.

Cesario da Silva sujere ba entidade relevante atu halo konsultasaun públiku kona-ba implementasaun ODS relasiona ema ho defisiénsia atu sira mós bele informadu di’ak liután prosesu hotu hodi bele kontribui ho efetivu molok elabora relatóriu ruma hodi ba aprezenta iha internasionál kona-ba implementasaun ODS.

“Importante liu mak halo konsultasaun públiku ba organizasaun sira ne’ebé mak serbisu tau-matan ba ema ho defisiénsia atu sira intende, nune’e sira bele kontribui ba servisu hotu, ne’ebé mak ita ko’alia kona-ba dezenvolvimentu nasionál, organizasaun ema ho defisiénsia hakarak kontribui maka’as ba ida ne’e”, konsidera ezekutivu foinsa’e ne’e.

Ezekutivu ADTL esplika Timor-Leste adopta ODS no haktuir ba prinsípiu fundamentál ODS nian katak la husik ema ida iha kotuk, iha aspetu dezenvolvimentu nasaun nian.

“Tanba ne’e asosiasaun advoka nafatin atu serbisu ho entidade hothotu atu ita atinje objetivu ida ne’e atu lori ema hotu avansa iha filleira ida ne’ebé hanesan iha prosesu dezenvolvimentu nia laran,” nia subliña.

Programa Oitavu Governu Konstitusionál, ne’ebé lidera husi Primeiru-ministru, Taur Matan Ruak sita iha pájina 35, númeru 2.3.5 (Grupu Vulnerável Seluk) prevee sidadaun ne’ebé ho defisiénsia goza direitu ne’ebé hanesan nomós sujeita ba dever ne’ebé hanesan ho sidadaun seluk, exetu kona-ba ezersísiu ou kumprimentu devér ne’ebé nia labele hala’o tanba razaun defisiénsia.

Hanesan medidas apoiu ba grupu sidadaun sira ne’e, Governu sei estimula kriasaun negósiu autosustentável ba sidadaun ne’ebé ho defisiénsia, hadi’a kapasidade iha país tomak atu presta servisu ho kualidade ba ema vulnerável, inklui konstrusaun ekipamentu ho asesibilidade ba ekipamentu instituisaun públika nian.

Dezenvolve programa apoiu ba família ho komunidade ne’ebé tau-matan ba ema sira ho defisiénsia, Kontinua dezenvolve Programa Reabilitasaun ho prestasaun servisu no divulgasaun, hodi hadi’a kualidade moris ema sira ne’ebé ho defisiénsia, liuhusi reabilitasaun ne’ebé espesializada no integrada.

Halo levantamentu kona-ba ema sira ne’ebé ho moras krónika no kria pograma apoiu, nomós promove kampaña sensibilizasaun kona-ba moras krónika, implementa Deklarasaun Maubisse ne’ebé foka liu ba fó oportunidade ne’ebé hanesan ba feto, hanesan kona-ba edukasaun ho formasaun profisionál, asesu ba merkadu traballu no ba vida sosiál ho polítika.

Implementa programa reabilitasaun ba rekluzu ka prezu ho eis-rekluzu ka eis-prezu ba sira-nia integrasaun iha sosiedade, investe iha programa asisténsia alimentár, hodi apoia vítima dezastre naturál no indivídu ho família vulneravel sira, hadi’a mekanizmu sokorru ho asisténsia ba vítima dezastre naturál, inklui konstrusaun infraestrutura, ho distribuisaun materiál konstrusaun no materiál ba armazenamentu.

Realiza asaun formasaun ho kapasitasaun ba prevensaun, mitigasaun no asaun ba kazu dezastre naturál, iha komunidade iha País tomak, halo levantamentu kona-ba ezisténsia toksikudependente iha país no kria kondisaun ba sira-nia rekuperasaun ho akonsellamentu, nomós reforsa kampaña sensibilizasaun kona-ba konsumu droga no kombate tráfiku ilegál.

Inklui, apoia Komisaun Nasionál Kombate ba HIV-SIDA no kontinua realiza kampaña prevensaun kona-ba tranzmisaun HIV-SIDA, fó apoiu ba pasiente sira iha Casa Rekuperasaun Saúde, iha Tibar, nomós hadi’a asisténsia kona-ba alimentasaun, kuidadu saúde no tratamentu ba pasiente ho moras HIV-SIDA no dezenvolve kampaña integrasaun no terapia okupasionál.

Jornalista: Rafy Belo

Editora: Rita Almeida

HUSIK IDA HATÁN