DILI,(TATOLI)–Xefe Departamentu Sirurjia atuál espesialista ba kankru susun iha Ospital Nasionál Guido Valadares(HNGV-sigla Portugués), Alito Soares hatete, inan feto sira presiza halo tratamentu sedu bainhira identifika sintoma moras iha susun hodi prevene moras kankru iha Timor Leste.

Tuir dadus ne’ebé nia parte rejista, ema 325 maka sofre moras kankru durante tinan haat hahú husi tinan 2015 to’o 2019.

“Kuandu moras ne’e iha karik presiza identifika sedu, refere sedu, diagnóstika sedu hodi halo tratamentu”, informa Alito Soares ba jornalista, ohin, iha HNGV.

To’o ohin parte ospitál seidauk identifika kauza loloos hosi kankru ne’e, maibé tuir koñesimentu médiku tanba des-organizadu selulár iha korpu. Nune’e mós fatóres jenétika tanba família  ida hanesan inan ida hetan kankru sei afeta mós ba oan feto.

“Nia kauza ate data ita lahatene, maibé fatór risku aas tebes ne’e jenétika kuandu inan ida hetan kankru susu ka avó feto ida hetan kankru susu  ne’e risku boot tebes maka nia oan feto hetan kankru susu”, nia hatutan.

Konsume ai-moruk ba programa  planeamentu familiar, tuir Alito Soares, mós risku ba feto sira atu hetan kankru susu, no fatóres seluk maka konsume alkohol, sigarru no konsume hahán sira ne’ebé prevene bokur.

“ Sira ne’e sai hanesan fatór risku tanba des-organizadu ormonál iha ita nia isin. Ormonál sira ne’e maka korresponde formasaun selulár kankru iha ita nia isin, ita seidauk iha data kona-ba hahán saida maka halo, maibé ita kompara iha tinan 10 liubá hahán seidauk tama livre iha timor moras sira ne’e la sa’e maka’as tanba ita identifika kazu kankru ne’e ida, rua de’it”, esplika xefe Departamentu ne’e.

Piór liu maka kazu kankru susu maioria sofre hosi feto-ran sira ho tinan 18, 19 no 20 to’o haat nulu kompara ho nasaun seluk feto sira ne’ebé kona kankru pruvulta tinan 40 ba leten.

Atu prevee, tuir nia, servisu saúde sira tenke halo edukasaun sívika no sosializasaun ba komunidade atu iha koñesimentu ba moras kankru hodi halo tratamentu sedu.

Nia afirma mós katak, ekipamentu   hodi halo  diagnóstika para  deteta tipu kankru no ai-moruk kemoterapia laiha  maka  sai problema sériu ba ospitál atu halo atendimentu ba pasiente sira bainhira identifika  hetan moras kankru.

Durante ne’e ospitál transfere pasiente ba rai liur maioria moras kankru , fuan no rins, enkuantu ba kankru susun ema na’in 6 maka oras ne’e halo tratamentu iha rai li’ur.

Hosi total númeru kankru ne’ebé rejista,  porsentu 50 maioria tama kategoria króniku tanba da’et ona ba órgaun vitál sira hanesan pulmaun, aten, kakutak no ruin hodi rezulta mortalidade to’o ohin porsentu 90.

“Problema la hotu iha rai li’ur bainhira sira ba tratamentu  tanba bainhira sira fila mai atu tratamentu kontinuasaun ai-moruk ne’e oinsá ne’e problema”, nia tenik tan.

Jornalista: Agapito dos Santos

Editór: Francisco Simões

 

HAKEREK NO HATÁN

Please enter your comment!
Please enter your name here