Diretór Jerál (DJ) Ospitál Nasionál Guido Valdares (HNGV-sigla Portugés), Aniceto Cardoso Barreto. Imajen/Espesiál

DILI,(TATOLI)—Ospitál Nasionál Guido Valadares (HNGV-sigla portugés) husu ba doadór atu bele  fó apoiu tékniku ba planu estabelesimentu sentru tolu (3) iha HNGV, kompostu husi sentru Kardíaku (Korasaun),  Ekolójiku ho Sirurjia (Kakutak).

Tuir polítika no planu Governu nian katak, entre tinan 2019 no 2020 sei estabelese sentru tolu ne’e, atu oinsá mak kria kondisaun di’ak no dignu ba fasilidade ho atendimentu iha HNGV.

Liuhusi enkontru ho parseiru sira, hanesan Organizasaun Saude Mundial (OSM/WHO-sigla ingles), UNICEF, UNFPA, Royal Tailándia KOIKA, JIKA, Embaixada Australia iha Timor-Leste ho Embaixada Alemaña iha Timor-Leste, ohin, iha HNGV,  Dirijente HNGV aprezenta implementasaun planu estabelesimentu ba sentru tolu ne’e atu oinsá mak hetan apoiu husi doadór sira.

“Ohin ami bolu ami nia parseiru sira ne’ebé suporta ami  hodi habelar informasaun katak ami sei implementa programa ne’e tanba orsamentu governu tau ona no ita presiza tan suporta tékniku hodi estabelese fatin”, informa Diretór ezekutivu HNGVAniceto C. Barreto.

Liuhusi enkontru ne’e, HNGV mós aprezenta ba parseiru sira kona-ba kazu moras kankru ne’ebé barak liu atu ospitál atende ho limitasaun ekipamentu no medikamentu. Ho nune’e,  tenke transfere ba rai li’ur.

“Ida fali kona-ba reforsa ICU no HDU tanba fatin rua  ne’e  importante ba moras krítiku atu hetan fatin apropriadu.  Tanba ne’e, ami husu mós doadór sira nia atensaun  para bele hetan apoiu”, hateten Aniceto Barreto.

Parseiru sira deklara ho sira nia  kompromisu atu apoiu HNVG ba implementasaun polítika ne’e, maibé sujere atu HNGV tenke hatama proposta. Ezemplu, organizasaun saúde mundiál, embaixada Tailándia, promete sei apoiu  ba reforsa área kankru inklui parseiru, seluk hakarak ajuda HNGV.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here