Ofisiál PNTL hosi Unidade Espesiál Polísia (UEP). Imajen/António Gonçalves

DILI, (TATOLI)—Atu atinje Komandante Jerál Polisia Nasional Timor-Leste (PNTL), Komisáriu Faustino da Costa, nia espetativa hodi asegura movimentasaun iha kapitál Dili durante oras 24 nia latan, tuir Fundasaun Mahein (FM) nia haree katak, Komandu PNTL tenke kumprimenta ba planu estratéjiku no doutrina polisiamentu nian ho naran VIP (vizibilidade, involvimentu no profisionalizmu).

Ofisiais PNTL husi Unidade Tranzitu wainhira partisipa iha seremonia aniversariu PNTL ba dala 19 iha Sentru Formasaun Akademia Polisia, Comoro, 27 Marsu 2019. Imajen/Antonio Gonçalves

Diretór Interinu Fundasaun Mahein, João Almeida, hateten, implementasaun seguransa iha oras 24 nia laran hodi asegura liberdade movimentu iha kapitál Dili, la’ós foin mak atu halo, maibé mai nanis tiha ona iha tinan 2014 bainhira PNTL trasa ninia planu estratéjiku, adopta mós doutrina polisiamentu ho naran VIP, liuliu iha vizibilidade ne’e prezensa polísia nian iha komunidade liuhusi Ofisiál Polísia Suku (OPS) iha bairru, aldeia no estrada públiku sira.

“Vizibilidade ne’e ko’alia kona-ba patrullamentu tantu patrullamentu Task Force ka patrullamentu Rodaviária (check point), maibé durante ne’e la akontese. Entaun, krime sira ne’ebé akontese iha estrada públiku ne’e tanba la hó prezensa polísia”, hateten João Almeida, ohin, hodi responde  Ajénsia TATOLI iha nia kna’ar fatin, Fomentu I, Dili.

Tuir nia observasaun,  governu kria ona kondisaun hodi harii postu polísia iha Dili laran tomak, maibé postu hirak ne’e barak hetan estragu husi ema deskoñesidu tanba polísia laiha ne’ebá, nune’e ema deskoñesidu aproveita halo krime.

“Ha’u hanoin katak ho lideransa foun PNTL ne’e importante atu garante vizibilidade polísia nian iha estrada, bairru no iha aldeia. Ida ne’e, sei bele prevene krime ka konflitu ne’ebé durante ne’e ita hotu preokupa”, tenik João Almeida.

Nia husu ba lideransa foun PNTL atu labele halo de’it deklarasaun, maibé tenke halo medida konkreta ruma, liuliu vizibilidade polísia nian. Importante mós mak tenke implementa planu estratéjiku PNTL 2014-2018, nune’e bele orienta servisu PNTL la’o tuir planu ida no programa ida nune’e bele iha rezultadu intermu prevensaun krime no konflitu.

Iha planu estratéjiku 2014-2018, João Almeida hateten, ko’alia kona-ba operasaun, katak iha operasaun ne’e maka hatuur medida sira ne’ebé maka liga ho operasaun polísia ninian, liuliu kona-ba prevensaun krime iha komunidade nia leet.

“Durante ne’e ami observa katak planu estratéjiku ne’e la ezekuta ho di’ak tanba lideransa PNTL laiha vontade halo servisu no konsentra iha área sira ne’ebé maka importante. Tanba ne’e maka ita preokupa nafatin ho krime sira ne’e”, tenik  João  Almeida.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here