Eis-Prezidente Repúblika, José Ramos Horta, akompañadu hosi nia amigu emprezáriu hosi Hongkóng, Michael Ong, hasoru Primeiru-Ministru, Taur Matan Ruak, iha Palásiu Governu, sesta, (29/3). Imajen hosi mídia GPM

DILI, (TATOLI) – Eis-Prezidente Repúblika, José Ramos Horta, konvida emprezáriu Hongkóng,  Michael Ong, ho ninia ekipa mai Timor-Leste hodi hasoru Primeiru-Ministru, Taur Matan Ruak, ko’alia kona-ba potensialidade ne’ebé Timor iha ba rai li’ur.

“Enkontru di’ak ho Primeiru-Ministru hodi diskute ideia balun oinsá halo promosaun boot Kafé Timor iha Xina no Hongkóng, no mós oinsá promosaun produtu seluk Timor nian. Horiseik sira to’o ami ba liu Railaku hodi haree Kafé”, dehan Horta ba jornalista sira iha Palásiu Governu, ohin.

Tuir Horta empreza ne’e mai vizita Timor-Leste durante loron rua hodi ajuda Governu buka investor.

“Nia la mai buka kontratu, nia la mai buka halo estrada ou eletrisidade, maibé nia hakarak dada ema husi li’ur mai para investe no mós dada turizmu. Hanesan mós dada ema atu mai halo otél iha ne’e”, katak.

Nune’e Premiadu Nobel Pás ne’e haktuir enkontru ne’e Xefe Governu kontente no hakarak haree ideia balun mak ohin diskute, ba oin bele realiza no implementa.

“Ha’u nafatin buka informalmente husi sorin-sorin hodi tulun Governu para ekonomia bele la’o no iha estabilidade, hanesan obrigasaun nu’udar eis-Prezidente Repúblika no sidadaun sei servisu nafatin ho Primeiru-Ministru”, dehan.

Nia hatutan: “Ideia ida mak sei haree oinsá mak bele halo eventu boot ida iha Hongkóng, señor Michael Ong, mak sei organiza, lori membru Governu no halo promosaun Timor nia ba investor sira, tanba Hongkóng hanesan merkadu finanseiru ne’ebé boot liu iha mundu”.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here