Embaixadora Timor-Leste ba Korea Súl, Adalgisa Maria Soares Ximenes. Imajen Egas Cristovão

DILI, (TATOLI) – Embaixadora Timor-Leste ba Korea Súl, Adalgisa Maria Soares Ximenes, hatete embaixada serbisu hamutuk ho Sekretáriu Estadu Formasaun Profisionál no Empregu (SEFOPE) hodi haree traballadór timoroan sira ne’ebé servisu iha Korea Súl.

Diplomata timoroan ne’e konsidera situasaun no lala’ok traballadór timoroan sira iha Korea Súl, la’ós la’o di’ak de’it maibé mós la’ós aat hotu, tan ne’e nafatin buka meiu atu apoiu timoroan sira atu bele serbisu ho di’ak.

“Ami sempre prontu fó apoiu atu ita-nia traballadór sira serbisu ho di’ak i sira iha ne’e (Timor-Leste) ba nafatin. Sira ne’ebé kontratu hotu ona fila fali mai atu fó fali tempu, oportunidade ba fali sira ne’ebé mak atu ba”, hateten Adalgisa Ximenes ba TATOLI hafoin soru-mutu ho Sekretáriu Estadu Komunikasaun Sosiál, Merício Juvenal dos Reis Akara, iha Palásiu Governu, sesta, (29/3).

“Kona-ba pasaporte sira, ami mós nafatin halo kooperasaun ho ministériu relevante, hanesan justisa para bele ajuda kolega sira bainhira hetan difikuldade ho pasaporte”.

Embaixadora Adalgisa Ximenes mós haktuir katak nasaun 16 mak haruka nia traballadór sira ba serbisu iha Korea Súl.

“Iha 2018, ita tama peringkat (klasifikasaun), ita bele dehan hetan persentajen boot ba alin sira ne’ebé mak ilegál. Maibé iha aspetu barak iha persentajen ida ne’e, iha buat barak; balun mak lakon pasaporte, balun tanba serbisu todan liu”.

Nia haklaken bainhira SEFOPE haruka traballadór timoroan sira ba serbisu iha Korea Súl, traballadór timoroan sira ba kedas ho kontratu ida katak sira bele serbisu de’it iha kompañia sira ne’ebé mak sira kontratu ba maibé tanba dala barak mós serbisu todan, entaun dezanima sira hodi sai.

Nune’e, nia dehan tan kompañia sira ne’ebé anteriormente traballadór timoroan sira serbisu ba legalmente konsidera ona traballadór sira ne’e la serbisu ona ba sira.

“Dalaruma ita rona liafuan sira hanesan ne’e (ilegál) todan demais mas lae. Ida ne’e situasaun sira mak halo. Ami sempre nafatin ajuda sira atu bele mantén, sira ne’ebé mak labele duni ita labele halo buat ida, ita konsidera, haruka sira fila fali”.

“Ita tama iha kuartu lugar nasaun ne’ebé mak iha irregularidade lubuk ida maibé ami espera katak tinan ne’e ami bele redús”, katak tan.

“Semana-semana sira (traballadór) ba nafatin (iha Korea), ita espera katak sira ne’ebé ba ho enerjia foun bele akompaña nafatin sira-nia serbisu ho di’ak”.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here