Foto google

DILI, (TATOLI) – Ministériu Administrasaun Estatál (MAE) husu atu aban, 29 fevereiru, sidadaun ida-idak tenke garante nia an hodi kumpre rezolusaun Governu nian hodi kontribui másimu iha asaun limpeza jerál nu’udar knaar no responsabilidade hodi tau-matan ba problema lixu.

Rezolusaun Governu númeru 8/2019, 20 fevereiru, ne’ebé foin lalais aprova iha Konsellu Ministru sobre promosaun ba asaun limpeza jerál husi tuku 14.00 to’o 17.00 iha últimu sesta kada fulan ne’e ba instituisaun Estadu no apela mós ba sosiedade sivíl, populasaun hotu hodi partisipa iha atividade ida ne’e.

Sekretáriu Autoridade Munisípiu Dili MAE, José Filipe Smith, hatete rezolusaun ne’e polítika Oitavu Governu nian ne’ebé bá oin kontinua nia programa limpeza ne’ebé maka sei envolve entidade hotu-hotu liuliu instituisaun Estadu, populasaun iha Dili atu kumpre ida ne’e hodi tau-matan ba problema lixu.

Tanba ne’e limpeza ne’ebé akontese aban, tuir planu ne’ebé trasa ona liuhusi mapeamentu limpeza ne’ebé Munisípiu Dili rasik halo no distribui ona ba instituisaun sira atu hotu-hotu konsentra ba fatin ne’ebé mensiona iha mapa ne’ebé fahe ona.

“Ohin mós ami kontinua fó orientasaun ba administradór postu sira para habelar informasaun ba xefe suku, membru konsellu suku para aban hotu-hotu mobiliza populasaun sai iha bairru ida-idak nian halo limpeza”, José afirma iha konferénsia imprensa iha Palásiu Governu, ohin.

Nia hatutan: “Tenke hakru’uk ba orientasaun husi ita-nia na’i-ulun sira no ne’e sai hanesan devér, obrigasaun no responsabilidade ita hotu nian”.

“Kuaze ita halo fila-fila populasaun sira ladún partisipa, tanba ne’e ita hotu husu para abitante ida garante nia partisipasaun katak Dili ne’e labele depende de’it ba autoridade nia responsabilidade, Dili ne’e atu ema hotu asume responsabilidade katak Dili ne’e ha’u-nian, ha’u mós iha devér no obrigasaun atu kuidadu no kombate lixu”.

Tanba ne’e, nia afirma sidadaun ida-ida tenke garante nia an tanba programa ne’e iha sentidu nasionalizmu, tenke hatudu katak liuhusi kontribuisaun hodi kombate lixu ne’e mós prevene moras.

“Husu para sidadaun ida-idak fó netik kontribuisaun iha loron limpeza ida ne’e liuliu iha sidade Dili para Dili bele furak iha ita hotu nia matan no mós ema seluk nia matan”.

Diretora Nasionál Mobilidade Urbana Ministériu Administrasaun Estatál, Justina de Jesus Amaral, akresenta rezolusaun ida ne’e regula limpeza jerál iha territóriu laran la’ós iha Dili de’it, maibé ba mós munisípiu 12 para ida-idak kumpre nia devér hanesan sidadaun hodi halo limpeza jerál nune’e bele moris iha ambiente ne’ebé moos no saudavel.

Tanba ne’e MAE orienta nafatin munisípiu sira atu realiza limpeza jerál iha ida-idak nia fatin.

Xefe Gabinete Sekretáriu Estadu Komunikasaun Sosiál (SEKOMS), Júlio Gonçalves, hatete bazeia ba rezolusaun Governu númeru 8/2019, 20 fevereiru, ne’e SEKOMS hola parte atu kontinua disemina informasaun ba komunidade sira oinsá atu kontinua limpeza ne’ebé maka halo iha sesta ikus kada fulan.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here