DILI, (TATOLI) – Diretór eskola tékniku koléjiu Don Bosco Fuiloro, Maliana no Fatumaka, Transfiguração Antonio Pinto, ohin hasoru Primeiru-Ministru, Taur Matan Ruak, hodi informa difikuldade ne’ebé eskola sira ne’e hasoru.

“Eskola sira tenke fó prioridade, tanba edukasaun importante ba timoroan hotu, kuandu ita iha rikusoin maibé ema ho edukasaun mínimu, ita labele dezenvolve di’ak hodi hadi’a povu nia moris no sustentabilidade Estadu nian”, katak nia ba jornalista sira iha Palásiu Governu hafoin hasoru Xefe Governu.

Nu’udar parseiru, nia realsa governu presiza toma atensaun ba infraestrutura eskola sira ne’e.

Alende infraestrutura, Antonio akresenta mós eskola sira ne’e presiza hasa’e kualidade rekursu umanu, hasa’e kualidade rekursu materiál, hadi’a kurríkulu, presiza halo manutensaun ba eskola no seluk tan.

Tuir Transfiguração setór edukasaun importante tebes ba timoroan hotu, tanba ne’e tenke investe maka’as ba área ne’e, atu Timor-Leste bele prodús kualidade rekursu umanu hodi dezenvolve Nasaun.

Entretantu, difikuldade hirak ne’ebé hato’o, nia dehan Primeiru-Ministru rejista ona no konsidera, rona preokupasaun sira ne’e atu ba oin bele toma medida.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here