Diretór Ezekutivu DHL Express Indonesia ho Timor Leste Ahmad Mohamad, Imajen/Egas Cristovão

DILI, (TATOLI) – Dalsey, Hillblom and Lynn (DHL) Express loke ona nia sentru servisu foun iha Dili, Timor-Leste ho investimentu $513,500 iha parte fasilidade nian atu reforsa konesaun entre empreza lokál ba merkadu internasionál.

Diretór Ezekutivu DHL Express Indonézia no Timor-Leste, Ahmad Mohamad, hatete hanesan nasaun joven ida iha mundu, haree Timor-Leste nia dezenvolvimentu ekonomia iha ritmu ne’ebé estavel iha dékada ikus ne’e.

“Tanba país ne’e kontinua foku ba dezenvolve infraestrutura no progresu ekonómiku, DHL, hanesan fasilitadór komérsiu, iha kompromisu atu ajuda negósiu iha Timor-Leste atu esplora ami-nia rede internasionál ne’ebé alkansa ona liu país 220 no territóriu”, Ahmad afirma iha Otél Timór, ohin.

Ahmad relata empreza esporta no importa sasán ne’ebé prezensa iha Timor-Leste tinan 20 ona ne’e nia kliente maka embaixada no empreza sira iha Timor-Leste, tanba sira hakarak utiliza kanál ida ne’ebé seguru, lalais no mós maioria atende ajénsia shipment sira.

Edificio DHL Express iha Timor Rua Fatuhada Dili, Imajen/Egas Cristovão

Nia hatutan ema ne’ebé serbisu iha empreza ne’e iha na’in-hitu ne’ebé maka husi ne’e na’in-neen timoroan ne’ebé maka na’in haat serbisu ona liu tinan sanulu.

Ho inaugura fatin foun iha Fatuhada ne’e serbisu-na’in sira orgullu tanba bele hetan fasilidade foun iha serbisu fatin.

“Ha’u mós hanesan tanba la’ós fasil atu hetan investimentu ba país Timor-Leste no bá oin espera ita sei hetan fasilidade ka ajuda kreximentu ekonómiku iha Timor-Leste ne’e maka primeiru, daruak, atu hafasil tan se iha nesesidade husi sidadaun iha nasaun ne’e hanesan servisu entrega sasán ho lalais ita esforsu atu serve ho di’ak”.

Diretór Ezekutivu ne’e dehan tanba DHL harii ona iha nasaun 220 no iha esperiénsia barak no servisu hamutuk ho parte Alfándega, Ministériu Turizmu no Komérsiu, iha nasaun hotu ho objetivu atu dezenvolve ekonomia nasaun no ida ne’e importante tebes no haree ba poténsia iha Timor-Leste ne’e boot.

Fátima da Costa, ne’ebé uza empreza ne’e hodi haruka sasán ne’e dehan prezensa DHL iha Timor-Leste ne’e fó benefísiu duni.

“Ha’u-nia sasán (kosmétika) haruka husi Malang (Indonézia) mai, to’o iha ne’e loron haat no lakleur sira haruka billete ida mai ha’u mai foti ona. Nia presu ha’u mai foti ne’e dolar 11”.

Utente DHL ne’e husu atu empreza ne’e bele alarga nia serbisu iha munisípiu atu fasilita ema iha ne’ebá labele tenke mai Dili maka foti sasán ka pakote ne’e.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here